نجل إبراهيم يسري يتذكر والده بموقف مؤثر ويكشف معلومات لا يعرفها أحد

نعى محمد ابن الفنان المصري الراحل إبراهيم يسري والده ببعض الكلمات المؤثرة التي تعبر عن مدى حزنه على فراقه.
ابن الفنان الراحل كتب على صفحته عبر «فيس بوك»: «الفراق صعب على اللي عايشين بس.. جملة سمعتها من واحد قاعد في المستشفي لما شافني شايل أبويا وداخل أغسّله ومن ساعتها وهي بترن في ودني».
وأضاف: «ممكن ناس كتير تشكك في مصداقيتي لو أتكلمت عن أبويا لكن بصراحة دي آخر حاجة ممكن أفكر فيها لإن ربنا وحده اللي عالم أن كل كلمة بكتبها دلوقتي مش هتوفي الراجل ده حقه».
محمد أضاف: «أنا مش بتكلم عن الفنان، لإنه زي أي فنان بيمتهن الفن لا يمكن الناس كلها تجتمع عليه وأكيد هتتفاوت درجات حبهم ليه.. أما الإنسان فده موضوع تاني خالص.. ومن نعم ربنا علينا انه الحمد لله حبب ناس كتير فيه وكلهم بيشهدوا بأخلاقه حتي لو علاقتهم بيه بس من خلال التلفزيون، كل اللي يعرفوني كويس عارفين اننا عيلة صغيرة اوي وعلاقتنا قوية اوي ببعض وده كله بفضل ابويا وامي برغم ان والدي فقد والديه وهو طفل صغير واللي ربته كانت اخته الله يرحمها.. وكانت نتيجة ده انه كبر هادئ الطباع، بيحب خصوصيته جداً، عاشق للقراءة، بيكره الصوت العالي وبيحافظ دايما على حدود الاحترام في التعامل مع أي حد بغض النظر عن مكانة الشخص ده سواء في الوسط الفني أو في الحياة العامة».
واستكمل: «وأنا طفل عندي 14 سنة كنت واقف في المطبخ وابويا الله يرحمه كان موجود وسامعني وانا باتكلم في التليفون وانا اهلي كانوا معودني اني أتكلم واقول اللي انا عايزه قدامهم عادي ومخافش لأَنِّي لو خفت ابقي بغلط، المهم انه سمعني وانا بقول على واحدة معانا في المدرسة انها سخيفة اوي وبعد ما قفلت التليفون جابني وقعد يتكلم معايا وطلب مني اني عمري ماتكلم على حد من ضهره واني حتي لما اكبر وأتعرف على حد عمري ماتكلم على أسراره أو عنه أبدا مهما كان غلطان فيا».
ابن الفنان الراحل اختتم كلامه بقوله: «هي دي أخلاق إبراهيم يسري، عاش رجلا بأخلاق الفرسان النبلاء حتى وان لم تكن تلك سمات زمنه ورحل عنا تاركا سيرة طيبة.. الفراق فعلا صعب على اللي عايشين بس.. بس لما بيكون حد ربنا محبب فيه الناس بالشكل ده بيبقي الفراق صعب أوي».
يُذكر أن إبراهيم يسري توفي في 20 من شهر إبريل لعام 2015، وذلك بعد دخوله العناية المركزة بساعات.