فلان : تعرف أن الجماعة البلطجية عندهم مفهومية كبيرة وبصراحة كبروا في نظري. علان : حيلك حيلك.. أنت بتحسدهم علي النعيم اللي هما فيه اليومين دول. فلان : لا باحسدهم علي العقل اللي هما فيه. علان : اشمعني!! فلان : لما رحت انتخابات مجلس الشوري زعلت جداً.. لأني لقيت اللجنة مفيهاش صريخ ابن يومين.. وكأن انتخابات الشوري لمؤاخذة سابوها مكشوفة ومشي عليها "برص". علان : والبلطجية محلهم إيه من الإعراب؟! فلان : ناس "كومل" لقيوا الحكاية مش مستاهلة.. غابوا عن اللجان. علان : حضرتك بتتكلم عن لجنتك يعني مكان واحد.. لا يمكن يدينا صورة كاملة. فلان : بس المنطقة اللي كنت محظوظ بالانتخاب فيها.. فيها كوكبة عظيمة من السادة البلطجية.. ويظهر أن الشوري مفيش فيه مصلحة زي الشعب. علان : وأنت زعلان علي البلطجية ولا علي الشوري؟ فلان : لا زعلان علي نفسي.. وزعلان من نفسي!! ابن البلد