مش وقته دلوقتي

من شبرا طالعه في مسيرة
شايلة صورة الشهيد دانيال
في حجابها زي الأميرة
الدم واحد والفلول أندال
وأبونا شايل صورة الشهيد عفت
أنا عارفه عاشق للأدان
يرفعه رفعت
ومسيرة جاية من ناهيا
تحت البيوت ماشية تنورها
أوعي تفكر ان البيوت ساهية
كل البيوت فرحت بثوارها
جايز بعضها زعلان
م الكدب اللي بيسمعه
الثورة فاتحة المزلقان
وغناها طالق مدفعه
الثورة بيضا وسلمية
وعارفه أسماء البلطجية
واللي بيدفعوا ليهم
فلول.. الغل ماليهم
بريئة الثورة يا زعلانين
يا مصدقين إعلامهم الكاذب
أراجوز في إيد المفسدين
ارقص.. بيرقص
نام.. ينام
نومة العازب
الثورة قايمة يا عساكر
الثورة قايمة يا برلمان
مش ناوية تقطع تذاكر
مش ناوية تخرج م الميدان
نزل الشباب لميدانه من تاني
نزل وقال ماهيش حفلة
لسه الجروح واجعة أوطاني
لسه الطرق في وشنا قافلة
لسه الحاجات إياها مالية البلد"
زي ما قال عمنا جاهين
قاعد نظامهم بس مش للأبد
لما يغور تلقانا محتفلين
لما يغور وصفحته تتقفل
ممكن ساعتها
ننزل نحتفل