بالتحديد - يا عيني علي الكلاسيكو ولا عزاء للعك المحليبقلم:

* من لم يشاهد كلاسيكو الكرة الإسبانية أحلي كرة في العالم من جميع عناصرها فقد فاته الكثير والكثير وبالتأكيد اخوانا سواء الأجهزة الفنية والبهوات اللاعبين وكذلك الجماهير سعداء بمستوي العك الكروي في الدوري المحلي اللي أصبح كل أمل الأهلي والزمالك ان حرس الحدود يخسر أو يتعادل.. ويا دوب الاسماعيلي يفوز علي أبناء العم والشرطة يهدي الفوز للأهلي وسيد عبدالحفيظ يتهم الحكام باضطهاد الأهلي يا راجل قول كلام غير ده.. بامارة ال 36 بطولة دوري و32 بطولة كأس.. جت علي بطولة وح يبقي اضطهاد والله دي حاجة تضحك.. والزمالك يا دوب هزم الداخلية في شوط والداخلية هزمه في شوط واللاعبين لعبوا شوط عال العال.. وسابوا الثاني لفرقة عبدالعال.. وفرقة الحرس أضاعت آمال الأهلوية في البقاء علي القمة لمدة 24 ساعة فقط وفي الدقيقة 90 فعلها أحمد عيد عبدالملك الولد الشقي اما تليفونات البرنس نمسك الخشب لحق نفسه وواحدة وواحدة هزم سيد البلد اللي حاله بقي عجب.. بس بصراحة ماكيدا مالوش ذنب ومبروك عليكوا الحضري لكن يا تري هو اللي ح يجيب اجوان.
* نرجع للدرس الخصوصي الكروي العالي بين برشلونة والريال.. ايه الحلاوة دي.. ايه الجمال ده.. ايه الروعة دي.. رغم انني عاشق للريال الا انني استمتع وأنا أشاهد البرصا.. فريق ولا في الأحلام.. تقدم الريال عن طريق كريستيانو رونالدو.. لكن الشوط الثاني أظهر برشلونة الوجه الآخر وتعادل وفاز.. ولم تخرج جماهير الريال عن النص.. ويا سلام علي الحكم.. ايه التحكيم ده.. علي فكرة اننا مش عاوزين نتعلم من الحكام.. والجمهور.. والريال.. والبرصا.. احنا فرحانين بالعك بتاعنا لاننا لو اتعلمنا ح نلاقي اللي بيحصل عندنا ده مش اسمه كورة.. ده حاجة كده علي ما تفرج.. وضحك علي الدقون.. وجماهير في واد.. وما يجري في الملعب في واد آخر.. يا خسارة.. مش عاوزين نتعلم.. احنا فالحين في التقليد الأعمي وبس.. مش كده ولا ايه.
* مبروك للدكتور أشرف صبحي برئاسة ستاد القاهرة ليكون خير سلف لخير خلف اللواء عبدالعزيز أمين.. أعانك الله يا دكتور.
* الأخ عامر حسين رئيس لجنة المسابقات.. هي ايه الحكاية.. مش اتفقنا علي العقوبات المالية بدلا من بدون جمهور.. يا مجلس زاهر خلو البطولة تكمل.. الجمهور مش ح يبطل شماريخ.. ولا خروج عن النص.. لاننا مش عاوزين نتعلم.
* اللواء عصام صيام رئيس لجنة الحكام والنبي حبيبك.. قول للحكام ما يضطهدوش الأهلي ويخلو بالهم من الزمالك ويفتحوا عينهم شوية.. ويجروا جنب الكورة مش من نصف الملعب.. ويبطلوا طرد اللاعبين علي الفاضي والمليان بصراحة العملية مش ناقصة.
* يا خسارة علي منتخب اليد.. والطائرة.. والسلة.. غياب في لندن .2012