لمؤاخذة!

فلان: قوللي وحياة والدك.. هي الست الفنانة البلبوصة اللي كانت مجهزة شنطتها وناوية تخلع من البلد كلها لأنها مش هتعرف تخلع هدومها في الأفلام.. رجعت في كلامها ولا ناوية لسه تقطع بينا؟!
علان: أظن أنها شاورت عقلها.. بعد الزيارات المتبادلة بين جماعة الاخوان ونقابة الممثلين.
فلان: يعني الست هتقلع ولا هيمنعوا البوس وينشفوها عليها وعلينا؟
علان: طيب ايه رأيك أنا عندي حل يرضي جميع الأطراف.
فلان: الحقنا بيه يسترك.
علان: احنا نخلي الأفلام تمشي عادي ولما تيجي لقطة سخنة.. نضلم الشاشة ونكتب عليها "بوسة بمنافعها"!! وكل واحد يتخيل علي كيفه.
فلان: ولو واحدة هتلبس مايوه.
علان: مفيش مشكلة تلبسه فوق هدومها.
فلان: أنا باتكلم جد والموضوع مش سهل!
علان: ما هو فيه فرق بين "رقصة" وبوسة تعمل لهم فيلم.. وبين فيلم فيه مشهد لما تحذفه ما حدش بياخد باله خصوصا لما يتعرض في التليفزيون.
فلان: ان كان كده نقول للست اطمني وشوفي مصلحتك وخلي "شنطتك" عندنا في الحفظ والصون!
ابن البلد