الشعر

مش رصّ الكلام .. تسويد سطور
الشعر ميدان للأمور
الشعر غالي .. ومش رخيص
الشعر بحر كبير .. هويس
الشعر فارس .. أو عريس
************
فات الأوان اللي بقي فيه الولد يمدح مدير
لا جل ما يرضي علي عامل صغير
بالذمة دا أدبه يحلق في السما
أو يوم يطير؟
فنه حقير
الشعر للإنسان سفير
معني الكلام..
لو توزن الشعر ف كلامك
لو تمتلك ناصية زمامك
لو تمشي في خط التزامك
تبقي كبير .. تصبح أمير
************
الشعر فن وله أصول
ماتكنش للمعاناة ملول
أو كسول
معني الكلام ..
حدد مرامك .. اظبط كلامك
بعدين تقول
************
الشعر يبني قصور كبيرة في الخيال
الشعر شامخ كالجبال
الشعر يتحدي المحال
الشعر للشاعر حصان جامح عنيد
تمسك زمامه بقيد .. وتلجمه بالإيد
تمتلك ناصية أموره ..
بالأصالة .. وبالجديد
************
الشعر جني .. يطوف معاك المملكات
يلهمك كل المعاني الممكنات
وغير الممكنات
ينطق معاه كل السكات
************
الشعر زي السيف .. وبرضه كما الوتر
يعزف عليه .. أحلي ألحان القدر
الشعر قلب كبير .. يساع كل البشر
الشعر كما عاشق كبير ولهان
يسهر ليالي الحب مع ضي القمر
************
الشعر زي الريح .. وبرضه كما الدوا
الشعر دا صرخة صريح ..
من قلب عاشق للهوي
قلبه جريح
يبني صروح المجد مع كل هزة للقلم
مع كل همسة ريح.
عايش ربيع الحب مع نبع الأمل
ويقولها بالفم الفصيح
أهو دا بقي الشعر بصحيح.