فلاش باك

مفيش حاجات كانت هناك
ولا كات هنا
عشان ادوب ف رمش عينك م الضحا
لحد الممات
ولا كانش فيه
غير دمعه ناشفه ع الخدود
واجران سكات
حتي الأمل مشفتهوش
ما عشتهوش غير لما كنت ب اسرقك
واسرح بعييد وافتح شبابيك الغياب
واكتب كتابك ع الولد
من غير شهود عند مأذون الغرام
واخلع هدوم الخوف شويه واتفرد ....
وابدر دموع العاشقين تطرح يمام
تنزل ف إيدك ف اتولد
عاشق جديد يحلّيِّ ف سنين العذاب
يا ميت نهار جوه أحلام الغلابه
ب اكرهك ب اكره العجز المعشش جوه مني
والهروب جوه السكات
سكووووت هناك ........
.. مشهد حقيقي مش كلام شاعر
يغني للعيال الشقيانين
رقصة الجوع و العذاب
حبة عيال متشعبطين علي غصن شوق
وجناح سلام
رافضين يصيروا للعدم
رافضين طابور الانتظار
راسمين عيونك يا حبيبتي
جوه نن العين وبس
والموت كتير الموت فرح
رصيف بيحضن ف النهار
شيلو الستار
خبوا الألم الله عليك
صورة حبيبتي ف العلم سكر قوي
الللللللله قوي
كان نفسي فيكي يا حبيبتي
بدون مرار ورق الجرايد
ميت كفن قلبي يا صاحبي
ياللي راقد ع الطريق
ضحكة عنيك لمسة ايديك
فتحت طريق الإمنيات
مدفون يا صاحبي جوه مني بالعلم
جوه شعر الصحبجيه
ف قهوة بلدي بنشربك شاي ع الفطور
وف المسا بتضم فينا يا حبيبي بكل شوق
و تشم ريحتك تنبسط
فتغني لعيون الصغار سكوووووووت هناك ....
. صدر القرار مشهد الفصل الأخير
ترابيزه فاضيه للقمار
حبري سري طلسمة كل الحدود
كل العقول طيري يا طيارة خضرة م المطار
ابعت يا عم ياللي منتش عمنا
وشوش جنابك تسرق الحلم الكبير
تقتل القلب الحرير
و ارقص جنابك ف الفضا بهدمة الواد الغفير
بملاية لف مرقعة بصوف الحصير
صورة حبيبها اللي مات جوه الحصار
يا دي الغبار
العقل طار
لسه العيال السمر بيلعبوا فوق الرصيف
شيلوا الحصير لمّوا الخيم
لوّنوا وش الحجاره بالعلم
و افرشوا بطن الحواري بالخَضار
يا مييت خساره ع الأمل
بيزنطه من باب الوزير ....!!!
و شيخ مشايخنا اتهبل
يتوضي من بول الحمار ...!!
حتي اللي غار اللي ما كان
غير صورة حلوة تترسم
ف قلب كراس النصوص
بيغني من شعر الهنود
و نصبو له فينا ألف زار
مين السبب ؟! مين الحمار ؟!
وانا لما جيتلك يا حبيبه
كنت فاكر إن انا و بس الأمير
واني الوزير
واني اللي ساكن جوه نبضك ليل نهار
ليه لما جيت رغم الظروف
وانتي اللي عارفه قصتي
كتبتي اسمي فوق جدار المستحيل
ورفعتي صورتي و ابن طولون فوق الجدار
قلبي اللي مات مش مسامح يا حبيبتي
انك ف يوم تاجرتي بيه
أوعي تلوميه
أو يوم تنادي ع الولد
ينقش كفوفك ف الهوي بريش الغرام
أصل الغرام انا لمّا جبته جبته كله بالحنين مبقاش يفيد غير إني
آخدك ف الخلا و ارحل بعييييييييييد
و اكتب كتابك عند ماذون البلد
و احلم حبيبتي و لحد ما يموت المرار .