قصيدتان

التالتة تابتة
كلام كتير / من زمان
وأنا نفسي اقوله
قلبي ماشي ف الليالي
شايب وبيشب/ يوصل
بس متأخر وصوله
خطوتين والتالته تابته
جلادينك
ينهبوا الحلم ف خزينك
وانت ساكته
والخوف بيحزف ف اتجاهنا
في الأواخر
حلمنا المكسور شبهنا
في الأواخر
واحنا لسه .. لما نضحك
بنقول يا ساتر م اللي جاي
واللي جاي..
طعم الليالي المرة ف كتاب السنين
ياعاليه واحنا قصيرين
يا ميه واحنا العطشانين/ لعنيك
غنوه حب وغنوه حب..
بيلقطوه الطير وبيزرعوه..
أحلام .. ف الليل لما يضن
والأرض لما تئن
وتودع الأحباب
أموت أنا
أموت أنا
ف عنيها
والبحر لما يلاغيها
تبتسم وتقول سلامات
للرايحة والجايه
عصفوركناريا
خايل عليه الهوا. ودنيته
خايلاه
ورد القصايد ليه نداه
والورد ف كفوفها
وطن وناس وبيوت
وأموووووت أنا..
ف ايديها لما تتمد
يجري الفرح قبلي
وينادي ع الحلوين
متجمعين
ف شمس ضحكتها القطيفة
بنت الليالي السمحة
والروح الخفيفة / كلام
وسكوت
وأنا اللي أموت
وتعيشي يا بلادي