فيديو.. تعليق ناري من عمرو أديب على بيان الحكومة

علّق الإعلامي عمرو أديب، على بيان الحكومة، الذي ألقاه رئيس مجلس الوزراء، شريف إسماعيل، اليوم الأحد، أمام مجلس النواب، قائلًا: «لم يحظ البيان باهتمام كبير من المصريين، الناس اهتمت أكتر بانسحاب تشاد من تصفيات أمم إفريقيا، وتأزم موقف مجموعة مصر».
أضاف أديب، خلال تقديمه برنامج «القاهرة اليوم»، عبر قناة «اليوم»، «كان المشهد غير لائق على الإطلاق، تصفيق غير عادي، تهافت النواب على الوزراء من تاني عشان يمضوا على الورق، هو ده مجلس النواب اللي الحكومة هتخاف منه؟، شكل مهين، رجعنا 20 سنة لورا، هو ده مجلس نواب مصر؟ هتحاسبوا إزاي الحكومة بعد كده؟، كده خلاص الحكومة حطيت مجلس النواب تحت باطها، بوس وأحضان وبتاع، وطبعًا عشان كده ماكنوش عايزين يذيعوا الجلسة».
تابع: «ثورتين في البلد ونرجع تاني نقف طوابير أمام الوزراء عشان يمضوا؟، طيب ما تروح للوزير المكتب، ده بينكم وبين الوزراء شارع، إنما قدام الناس كده، إذا بُليتم فاستتروا، هل يصح هذا التصفيق الحاد لرئيس الوزراء؟، يا جماعة النواب وطوا قدام الوزراء، هل هو ده مجلس النواب اللي إحنا عايزينه؟، حاجة تنقط، كل ما نقول يا بلد لقدام نلاقي حاجات غريبة، هما دول اللي إحنا اختارنهم، كنا نجيب ختامة كبيرة بقى وبلاها مجلس نواب، هي البلد دي مش هتتغير بقى؟».