لهذا السبب لم يشارك هشام عبدالحميد في "شهادة ميلاد"

سمير عاطف:

أوضح الكاتب والسيناريست عمرو عاطف سمير أسباب عدم مشاركة الفنان هشام عبدالحميد في المسلسل الذي ألّفه "شهادة ميلاد"، ويقوم ببطولته الفنان محمد لطفي والفنانة إنجي المقدم.
وعبر صفحته على موقع التواصل الاجتماعي "فيس بوك"، كتب: "سؤال بيتكرر كتير جدا من الأصدقاء الصحفيين عن الفنان هشام عبد الحميد وهل تم استبعاده من مسلسل شهادة ميلاد بسبب انضمامه لقناة الشرق".
وأضاف: "الإجابة هى الفنان هشام عبد الحميد رشح لدور فى المسلسل ووافق على الدور ولما بدأنا التصوير فى شهر 1 كنا ها نبدأ بمشاهده فاتصل وقال إنه عمل حادثة فى كندا ومش ها يقدر يجي مصر، وإنه بالتالى بيعتذر عن المسلسل وكان مستحيل إن الديكور يتهد أو إن التصوير يتوقف، فبالتالى هشام عبد الحميد ما بقاش موجود معانا فى المسلسل".
وتابع: "مرة تانية بأأكد إن الكلام ده كان من أكتر من شهرين وماكنش موضوع قناة الشرق ده حصل، ده من ناحية من ناحية تانية حابب برضه أجاوب على سؤال تانى مهم: هل فيه حد فى الوسط الفنى بيتم استبعاده من الأعمال الفنية بسبب مواقفه السياسية سواء مؤيد أو رافض أو أيا كان رأيه؟ أيوه أكيد فيه، لكن أنا شخصيا -وباستثناء المشهورين قوي بمواقفهم أيام الثورة -ما اشتغلتش مع ناس عملوا حاجة زى دى ولا قابلت حد وحكالى حكاية عن استبعاده بسبب موقف أو رأى ولا أصلا ها اسمح لنفسي إنى أكون ضمن فريق عمل بيقيم الفنان حسب رأيه أو دينه".
وقال: "أعز أعز أصدقائي وزملائي مختلفين معايا وعمر ده ما منعنا من إننا نشتغل مع بعض ده على الأقل اللى أنا عارفه أو شفته أو قابلته".