سيدة المرج: "أمين الشرطة مسكنى من صدرى"

تحقيقات النيابة..

تعرضت السيدة غادة ح، للتحرش من قبل أمين شرطة بقسم المرج أثناء توقفها لانتظار زوجها بجوار محطة مترو عزبة النخل وتعدي عليها باللفظ وتحرش بمناطق حساسة بجسدها – بحسب أقوالها أمام فريق التحقيق التابع للنيابة العامة.
روت "غادة.ح.ع" خلال تحقيقات النيابة العامة تحت إشراف المستشار محمد عبدالشافي المحامي العام الأول لنيابة شرق القاهرة تفاصيل واقعة التحرش، حيث أكدت أنها كانت بصحبة كل من زوجها "محمد س" وابنها البالغ من العمر 8 سنوات، حيث كانت فى زيارة لشقيقة زوجته بالمرج، وكان بحوزتها وزوجها مبلغ من المال و أثناء عودتهم إلى منزلهم استقلوا مترو الأنفاق، وبجوار محطة عزبة النخل قال لها زوجها "استنى هنا، هروح اشترى شوية حاجات بسرعة وارجعلك".
قالت المجنى عليها أمام جهات التحقيق: "وأنا فى انتظار زوجى، لقيت أمين شرطة جه وقف أمامى، وسألنى انتى إيه اللى موقفك هنا؟، ساعتها افتكرته من أمن المترو، قولتله أنا منتظره جوزى، راح يجيب حاجة، فقال لى (لأ انتى مستنيه شاب، سيبك منه، وأنا مستعد أديكى اللى انتى عاوزاه بس تيجى معايا نقضى سهرة حلوة)".
أضافت: "ساعتها اتعصبت عليه وقولتله أنت بتقول إيه، ولما زعقت معاه، راح متحرش بيا، تحت تهديد السلاح، ومسك أيدي وقالى تعالى معايا دلوقت، ومسكنى من صدرى وأماكن حاسسة من جسمى، رحت مصرخه فى وشه، قام ساحب منى الشنطة بتاعتى بحجة إنه هيفتشها، وكان بها مبلغ مالى 1130 جنيهًا، وأثناء تفتيشها، بعدها جه جوزى جرى والناس كانت ملمومة علينا، ولما سألنى فيه إيه، شرحت له اللى حصل، قالى (طيب ماشى خليه ياخد الشنطة باللى فيها)، راح أمين الشرطة خد الفلوس اللى كانت فى الشنطة ومشى بالموتوسيكل بتاعه".
أردفت المجنى عليها:"وقبل أمين الشرطة ما يمشى زوجى سأله "أنت مين؟ وبتعمل كده ليه؟"، فالأمين قاله: "أنا (مدحت. ه)، وشغال فى مباحث قسم المرج، ولو عايز تعرفنى اسأل عنى، وبعدها مشى".
استطردت: "جوزى سأل الناس اللى كانت واقفه بتتفرج وقالهم (انتوا واقفين بتتفرجوا عليها إزاى من غير ما تتكلموا)، ساعتها جوزى توجه لقسم المرج عشان يحرر محضر لكن القسم رفض تحرير محضر بحجة عدم وجود شخص بهذا الاسم فى القسم، وأثناء خروجه وجد الأمين الذى قام بالتحرش بزوجته موجودا ولكنه هدده، فتوجه إلى وزارة الداخلية وحرر محضرا ضده".
تابعت: "فوجئنا يوم الاثنين اللى فات بقوة من قسم المرج، جت وخدت جوزى للقسم، وبعد ما رجع قالى إنه تم تهديده بتلفيق قضية مخدرات له للتنازل عن المحضر، ساعتها أنا نصحته إنه يروح يطلب مقابلة وزير الداخلية، وبالفعل راح لكن محدش سمح له بمقابلته ".
قرر المستشار محمد أباظة، مدير نيابة حوادث شرق القاهرة الكلية، وبإشراف المستشار محمد عبد الشافى، المحامى العام الأول، استدعاء أمين الشرطة هراس للاستماع لأقواله حول الواقعة، كما أمر بتوقيع الكشف الطبى على المجنى عليها، فضلاَ عن استعجال تحريات المباحث حول الواقعة.
شاهد الصور: