دعوة لتنظيم وقفة سلمية على أرصفة محطات المترو

ضد قرار زيادة ثمن التذكرة..

دعا نشطاء على موقع التواصل الاجتماعي "فيس بوك" إلى تنظيم وقفة احتجاجية على أرصفة المترو ضد زيادة ثمن تذكرة الركوب التي أعلنت عنها وزارة النقل، وذلك في اليوم نفسه الذي سيطبق فيه هذا القرار، ويبدأ التعامل على أساس ثمن التذكرة الجديد.
وجه النشطاء أصحاب الدعوة رسالة إلى المهندس هاني ضاحي وزير النقل قالوا فيها: (يا سيادة الوزير احنا مش مسؤولين عن خسارة الشركة 180 مليون جنيه لأن أولاً: أكيد الدولة كانت عاملة خطة وميزانية للمترو بحيث يكون وسيلة مواصلات مريحة للفقير والطبقة المتوسطة وفي نفس الوقت متخسرش.
ثانيا: لو حضرتك بتتكلم عن خسارة شركة ممكن أقول لحضرتك ممكن تكون خسرت بنفس الشكل اللي خسرت فيه 98 شركة قبل كده علشان يتم خصخصتهم بعد عملية المديونية الممنهجة.. إحنا خسرنا 98 شركة من شركات القطاع العام في فيروس الخصخصة الذي أصاب الدولة فجعلها تأكل في فقراء الوطن، حتى ثار الشعب وعبر عن انحيازه للعدل الاجتماعي في 25 يناير و30 يونيو.
المشكلة اللي طرحها سيادة الوزير هي تطوير محطات المترو، وعلشان كده لازم الغلبان يدفع فاتورة التطوير.. إحنا موافقين يتعمل صندوق لتطوير خطوط المترو وكل مصري يدفع جنيه ونطور المرفق لكن هترفع سعر التذكرة هيفضل الأغلبية من المصريين بيعانوا من زيادة السعر إلى أن تحدث ثورة جديدة.
احنا شباب مصر.. احنا أولاد الناس الغلابة وهندافع عن حقوقنا وحقوق أهلنا بشكل سلمي ومتحضر.. انتم طرحتم مشكلة واحنا بنطرح حلول، لكن مش هنسمح إن يكون الحل إنك تجوع عيالي".