جددت عائشة الشاطر، نجلة نائب المرشد العام لجماعة الإخوان لجماعة الإخوان المسلمين، تذكيرها بالمعتقلين، والمصابين والشهداء وأهاليهم، مطالبة بعدم نسيان هؤلاء خلال فرحة العيد. وقالت "الشاطر"، عبر صفحتها على فيس بوك: "وانت بتتبسط وبتخرج وبتتفسح في العيد، افرح بس متنساش الواحد وأربعين ألف معتقل في السجون، متنساش اللي في زنازين فردية مقفول عليهم طول الليل والنهار وحتى زيارة أهاليهم اتحرموا منها افتكرهم زمان عيدهم عامل ازاي، افتكر أهاليهم اللي عيدهم كان هو الزيارة بتعبها ومشقتها ومهانتها بس كانت هي دي العيد عندهم واتحرموا منها العيد ده". وأضافت: "افتكر أسر المفقودين اللي مش قادرين يحسوا بالعيد لأنهم مش مطمنين على ذوويهم موجوعين بقالهم سنة وأكتر من غير ما يعرفوا هما عايشين ولا ميتين أو هما فين، افتكر أسر الشهداء اللي عيدهم حزين لأنهم ناقصهم يا أب يا ابن يا زوج كان عمود البيت، افتكر أسر المصابين اللي قلوبهم موجوعة على ولادهم بتعبهم، افتكر أسر المطاردين اللي مش قادرين يفرحوا بلمة العيلة علشان لو اتلموا هييجوا يقبضوا على المطارد ده، افتكر أسر المسافرين اللي لا حاسس بعيد في غربته من غير أهله ولمته وأهله هنا مش حاسين بالعيد وهو بعيد عنهم". وتابعت: "مش بنكد عليك، بس بفكرك بكل دول اللي العيد بالنسبة لهم ذكريات مؤلمة بتتجدد وافتقاد موجع عايشينه وبيتعاد، فافتكرهم في دعائك بأن ربنا يهون عليهم، افتكرهم ولو بزيارة أو حتى مكالمة، إنك فاكرهم مش ناسيهم، افتكرهم بالدعاء على اللي عمل فيهم كده وحرمهم، ربنا يحرموا زي ما حرمهم".