6 ابريل ل"السيسي": يعني إيه مش عايز مطالب فئوية !

هاجمت حركة 6 إبريل "عبد الفتاح السيسي" بعد تأكيداته اليوم بعدم تلبية المطالب الفئوية.
وقالت الحركة على صفحتها الرسمية: "طب الحد الأدنى اللي اتلغى ورجعوا تاني ياخدوا ملاليم لازم يسكتوا عشان ميعطلوش البلد!.. طب العمال اللي بيتفصلوا من شغلهم أو شغلهم بيتوقف ومحلات زاد وسعودي مثال، المفروض يسكتوا طب هيصرفوا على عيالهم منين!!"
واستكملت: "طب المؤقتين اللي عدى عليهم بدل السنة اتنين ومن حقهم يتثبتوا مش حقهم يطالبوا بده!!.. طب القرى اللي بتشرب مياه صرف صحي مش حقها تقف في وش النظام عشان يحل ليهم مشكلتهم!!"
واختتمت: "طب العشوائيات الخالية من المرافق مش حقهم يعترضوا عشان الحكومة تحن وتحس أنهم بشر !! وغيرهم كتير جدًا جدًا جدًا"
يشار إلى أن عبدالفتاح السيسى قال إنه لن يستطيع خلال الفترة الحالية تلبية أي مطالب فئوية، مشيرًا إلى أن "اللى هيطالب بمطالب فئوية مش واخد باله إن البلد مش هتستحمل كده, ولن أستطيع أن ألبّى مطلبًا واحدًا فئويًا.. مش هيحصل".
وأضاف السيسى, خلال كلمته بحفل تخرج الدفعة 108 من "الكلية الحربية", اليوم الثلاثاء: "مش هينفع إننا نطالب بمطالب فئوية, مفيش، مش مفيش علشان أنا مش عايز أو الحكومة مش عايزة, مفيش لأننا مش قادرين نلبى المطلب".
وتابع قائلاً: "الكلام فى الفلوس والإجراءات خطير وحساس أوى ولازم نخلى بالنا منه, لازم تكون فيه تضحيات حقيقية من كل مصرى ومصرية".