تسعه فى سته بكااااااااااااام

أمبارح وانا مروحه على بيتى ركبت المواصلات زى عامه الشعب الكريم وقعدت فى الطريق اللى بياخد ساعه حوالى 3 ساعات وشويه , ليه معرفش مع ان الطريق مكنش زحمه بس ربنا مايقطعلكوا عاده.
المهم انى لما قربت اوصل لقيت السواق بيقول جملته الشهيره حمدا لله على السلامه يااساتذه , فى الاول كنت بقول ايه السواق المحترم دا اللى بيرحب بينا فى المدخل وشويه وهيسألنا عن أخبار الرحله , الا ان شخص عزيز قاللى ان السواق مش بيطمن على اخبار حضرتك ولا بيرحب بيكى دا عاوز يقول هاتوا الاجره J

ماعلينا ... المهم عملت زى مابيعمل اى مواطن شريف ودفعت الاجره وكان حظى انى اتدبست فى تجميع اجره السواق , ولقيت راجل عجوز ورايا بيدينى الاجره ويقولى خدى ياابله من ال100 تسع انفار.
مسكت الميه جنيه فى ايدى وقعدت اعد على صوابعى وتنحت ورجعت للراجل تانى , قولتله يعنى اخد كام !؟؟؟
لقيت الراجل اندهش ورفع حواجبه والنضاره قربت تقع وقاللى مانا قلتلك خدى تسع انفار والنفر بسته جنيه وهاتى الباقى

ورجعت تانى اعصر مخى واعصر واعصر لحد ماعملت عصير مخيخ علشان افتكر
تسعه xسته بكااااااااااااااام
وبردو مفتكرتش !!
اخر مازهقت قولت للسواق بقولك ايه يااسطى هوا تسعه فى سته بكام ؟
قاللى وانا اعرف منين ياابله هوا انا احمد زويل !!
يعنى ياجدعان محدش حافظ جدول الضرب فى البلد دى غير احمد زويل !!!!
دا حتى السواق اللى بيبقى حافظ بيبقى حافظ بالممارسه مش بالدراسه
طيب واحنا ؟؟!!!
يعنى الخمناشر تمناشر سنه اللى قعدنا فيهم نحفظ جدول الضرب راحوا هوا , طيب الجدول اللى كان مطبوع فى اخر ورقه فى الكراسه خلاص نسيناه , ولما كنا بنعد على ادينا ورجلينا ونستلف صوابع الجيران فاكرين؟
طيب العلقه اللى خدتها من الاستاذ لما معرفتش 2x12 بكام راحت على الارض
دا حتى يومها الاستاذ خدنى على جنب وقاللى جدول الاتنين يبقى زودى على اللى قبله اتنين وهكذا, فتحى دماغك !!
ومن يوم مافتحته وانا مش عارفه اقفله وبقيت حافظه مش فاهمه والنهارده مش عارفه حتى احاسب السواق.
طيب السواق علشان بيتعامل على طول بالفلوس حفظ الارقام بالشبه كدا واخره فى الحساب عدد الركاب اللى معاه .

لكن انا بقى فضلت ادرس فى جدول الضرب وبعد كدا مستخدمتوش .
وفضلت ادرس لغه عربيه وناهيك بقى عن الضمير المستتر والمضاف اليه والمقدم والمؤخر اللى معرفناش منهم غير مقدم يجى ياخد حضرتك على التخشيبه والمؤخر علشان نشحطط الراجل فى المحاكم لو مدفعوش .

طيب بلاش دا كله وخلينا فى الانجليزى لغه الشعوب المتقدمه . احنا درسنا طول عمرنا انجليزى بريطانى زى اللغه العربيه الفصحى بالظبط اللى احنا مش بنتكلم بيها
يعنى حضرتك لو روحت كلمت واحد امريكى او حتى بريطانى باللغه اللى احنا اتعلمناها فى المدرسه هيقول على حضرتك اكييييييييييد دا مصرى J

علشان كدا اول مادخلت الكليه قالولى انسى الانجليزى اللى درستيه فى المدرسه وابدئى من جديد ولما خلصت الكليه وحبيت اخد كورس قالولى انسى اللى الانجليزى اللى خدتيه فى الكليه وابدئى من جديد ولما حبيت اسافر قالولى انسى الانجليزى اللى خدتيه طول عمرك وروحى بقى ادرسى انجليزى صح علشان تعرفى تتكلمى مع الاجانب!

طيب الانجليزى الى فات دا كان ايه ؟ طيب لما هوا ملهوش لزمه بيخلونا ندرسه ليه ,
طيب ليه مش بيوافقوا احتياجاتنا الدراسيه مع احتياجات سوق العمل الحاليه ,
طيب انا استفدت ايه من دراستى طول عمرى ؟؟؟
طيب اقول ايه للسواق ؟


الله يسامحك يابلد ضيعتى عمرى هدر.

أعرب كلمه هدر ؟؟