إنجي علي تكشف سر طلاقها من زوج "أصالة": مش عايزة أتكلم ببجاحة

كشفت الإعلامية إنجي علي أسباب طلاقها من المخرج طارق العريان ، مؤكدة أنها لا تريد الكلام عنه كثيرا بسبب زواجه من المطربة أصالة التي تعتبر من أقرب أصدقائها.
وقالت "إنجي علي" خلال لقاء مع برنامج "قطعوا الرجالة" الذي تقدمه الإعلامية راغدة شلهوب على قناة "النهار" : "أنا كنت بحب السينما جدا وطارق العريان كان مخرج سينمائي ومن هنا حصل ما بينا اهتمام مشترك ، وإحساس حلو واتجوزنا ثم انفصلنا لمدة 3 سنين".
وأضافت: "أعتقد إن الزواج هو مقبرة الحب وسبب الانفصال هو الروتين والمسؤولية والغيرة الزيادة اللي كانت عندي ، الناس بتبذل مجهود عشان علاقة الحب تستمر وبعد الجواز بيريحوا في حين العكس اللي المفروض يحصل ، أنت لما بتدي لحد حاجة بتبقى منتظر تلاقي".
وأضافت: "حاليا ماليش علاقة كبيرة مع طارق لكن مراته أصالة صاحبتي جدًا وبنسأل على بعض كتير .. هو مخرج شاطر وأنا بتمنى له كل حاجة حلوة بس في المطلق مينفعش الإنسان يتكلم ببجاحة .. يعني أنا براعي إن هو عنده بيته و ولاده وأنا كمان .. عشان كدا لما بنتقابل بسلم عليه هو وأصالة لما بشوفهم".