أديب يعلن عن استعداده لتمويل قناة "الشرق"

سخر الإعلامي عمرو أديب - مقدم برنامج "كل يوم" - من الأزمة الحادثة بقناة الشرق التي تبث من تركيا ، والتي تمثلت في قرار رئيسها أيمن نور بإغلاقها لحين إعادة هيكلتها حسب تعبيره .
وقال "أديب" في برنامجه المذاع على قناة "ON E T" : "حصلت حاجة غريبة خلت الواحد اتضايق واتخنق ودول بيبقوا زملاء إعلاميين ليك يعني .. قناة الشرق قفلت أو بتقفل .. حاجة تضايق .. يعني قناة زي دي وليها مشاهدة وليها جمهور تقفل .. بعدين تقفل ليه ؟ .. حضراتكم فاكرين لما طلعوا من فترة وقالوا إن الدكتور أيمن نور بياخد كل الفلوس ومبيأكلهمش وحاجات كدة يعني .. قعد نجل الأستاذ يوسف القرضاوي والأستاذ سيف .. وعملوا بيان وقالوا إن القناة بيتم ضربها .. والفلوس مبتجيلناش ومبناكلش وحالتنا صعبة وحاجات كدة ".
وأضاف: "الواحد متضايق لما صوت إعلامي شريف زي دة بيحز في نفسه يتقفل .. لو فيه إمكان يا جماعة قولولي ونمول .. نلم فلوس أو كدة .. نعمل حاجة كدة .. ماحنا في ايدينا برضو ".
وقرأ "أديب" بيان الدكتور "أيمن نور" مالك قناة الشرق الذي أعلن فيه إغلاق القناة ، معلقًا: "هما قالوا إن فيه ربع مليون دولار الدكتور أيمن بيحطها في جيبه وبيوزع عليهم الباقي فهما كانوا عشمانين إن هو يفك كيسه ويديهم من الربع مليون دة الناس قاعدة في غربة برضو".
وعلق على الجزئية التي اتهم فيها "نور" العاملين بالتواصل مع جهات داخل مصر ، قائلًا: "طلع الناس اللي بيشتغلوا معاه فجأة شغالين مع الحكومة المصرية .. تم تجنيدهم .. طلعوا عملاء .. طلعوا خونة .. طلعوا مباحث .. طبقًا ليه .. وكان لازم يقولنا مين دول عشان نعرف".. مضيفًا: "طبعًا القناة منشقة دلوقت .. آدي المعارضة وآدي قناة الشرق .. حاجة تحزن .. كان الواحد نفسه حاجة زي دي تفضل مكملة" حسب تعبيره.