والده ضحية ضابط السلام :"مين يعوضني 18 سنه تربيه"

قال والد الشاب "سيف" ، قتيل السلام ، الذي لقي مصرعه علي يد نقيب شرطه يدعي محمد فؤاد ، معاون مباحث قسم شرطه ثان السلام ،قبل ايام قليله ، أثناء وجود الضحية علي احد الكافيهات بشارع السنترال ، بمنطقة النهضة بالسلام لمشاهدته مباراة الأهلي والوداد المغربي
" قالولي إن سيف عمل حادثة ورجله أتكسرت، جريت لقيت ناس كتير أوي وأول مرة أشوفهم، وشوفت ضباط ورتب كتيرة عند مستشفى السلام، وعرفت إن ابني أتضرب بالنار،"
وتابع مسعد ل"المصريون " أثناء تواجدها لمعرفة تفاصيل الواقعة ، أنا مشفتش حاجة كل اللي واقفين وقت الحادثة أقسموا لى بكده، وقالولى إن في ضابط اسمه محمد فؤاد ضرب سيف أبنى ومات "
وأضاف الأب وفي في حاله شديدة من البكاء حزنا علي فراق نجله الوحيد: "سيف ده ابنى الوحيد عارفين يعنى ايه يتخطف منكم ابنكم الوحيد سيف ربنا رزقنى به بعد 30 سنة جواز، وربيته 18 سنة وفى الآخر مشفتش غير دمه هو اللى فضل وسيف راح".
يشير والد الضحية في حديثه إلى أن نجله متفوق دراسياً وكان سيدخل الثانوية العامة، إلا أنه فضل الالتحاق بالثانوي الصناعي لرغبته فى دراسة علم صناعة السيارات، وبالفعل حصل على شهادات تقدير من مدرسته وكذا حصل على دورات بشركة mcv ، التابعة لشركة مرسيدس، مؤكداً على وجود فرصة عمل له فى إحدى الدول الأجنبية بعد نبوغه فى مجال ميكانيا وفن صناعة السيارات، إلا أن "سيف" رفض السفر لخارج البلاد وفضل أن يبدأ حياته العملية فى بلاده عقب تخرجه بعد أيام قليلة.
ويستدرك الأب : "لو قالولى فى يوم إن ابنك شفناه بيشرب سيجارة مثلاً، كانت نارى هتبقى أهدى من كده عارفين يعنى ايه شاب لا بيشرب سجاير ولا يعرف أصدقاء سوء، ولا بيعرف يعنى أيه وقفة النواصي، يتخطف منك فى لمح البصر..كل ده ليه عشان ظابط مش عارف يقبض على متهم ويسيطر عليه فى دايرته، ويؤكد الأب إن نجله "سيف "كان يشاهد مباراة الأهلي وخلال ذلك اشتبه الضابط محمد فؤاد فى أحد الشباب ويدعى محمود أحمد، وشهرته«مقروصة» علي حسب قول شهود عيان "وطلب من أمناء الشرطة اقتياده لسيارة الشرطة، حتى تجمعت أسرة محمود ورفضت استقلال ذويهم سيارة الشرطة دون وجه حق، ليستكمل الأب: "تجمعت أسرة الشاب وأخرج الضابط سلاحه وخرجت منه 4 رصاصات إحداها فى الهواء والثانية فى صدر سيف ابنى، والثالثة فى جبهة نادر صديقه ، مصاب حالياً وأجرى عملية جراحية، وحالته حرجه غير مستقرة .
ويتابع في حزن وآلم ذنبنا ايه ان ضابط مش عارف يسيطر على موقف قدامه، يطلع سلاحه ويموت بيه ابني ليه؟".
"مش هقدر أقول غير حسبى الله ونعم الوكيل بعد ما سيف مات سمعت أخبار إنه تاجر مخدرات.. أصحابه قدامك أهم اسأليهم سيف كان بيشرب حتى السيجارة؟"، كلمات أكد عليها والد القتيل.