7 إجراءات أفقرتنا في عصرك

أبرز مؤيدي«السيسي»:

هاجم الدكتور خالد رفعت رئيس مركز طيبة للدراسات السياسية والاستراتيجية، الرئيس عبدالفتاح السيسي بسبب تصريحات الرئيس التي قال فيها «احنا فقرا أوي».
وانفعل الرئيس عبد الفتاح السيسي، أثناء مشاركته في الندوة المعدة للحديث عن الصناعات الصغيرة والمتوسطة للصعيد أول أمس ، قائلًا: "إحنا فقراء أوي ولازم تعرفوا كده .. ودولة فقيرة ..ولازم تفهموا إن أهل الشر مش عايزينكم تعيشوا".
من جانبه رد «رفعت»- وهو من أبرز المدافعين عن الرئيس- على تصريحات الأخير عبر صفحته على موقع التواصل الاجتماعي «فيسبوك»، قائلًا :« أيوة يا سيادة الريس .. احنا بقينا فقراء قوووووي».
وعدد 7 إجراءات اتخذ بعضها الرئيس ووقعت في عهده أخرى، قال إنها تسببت في فقرنا، قائلًا «بقينا فقرا في عصرك»، حسب قوله.
وقال «رفعت» :« عشان حفرنا تفريعة للقناة كلفتنا 64 مليار جنية.. وعملنا حفلة لافتتاحها كلفتنا 240 مليون جنية ! والايرادات بتنزل من ساعتها زى ما كل الناس توقعت .. المصيبة الاكبر اننا مش عارفين حنرجع للناس فلوسها فى 2019 منين».
وتابع:«عشان عملنا مؤتمر اقتصادى كلفنا 30 مليون جنية والعائد صفر !! ومن ساعتها عمالين نعمل مؤتمرات بلا اى عائد».
ومضى بالقول :«عشان بنعمل عاصمة ادارية جديدة بقرض صينى 45 مليار دولار (850 مليار جنية)».
وأضاف :«عشان عندنا 4653 مصنع اتقفل واتشرد العمال وقاعدين نوسع الطرق .. قال ايه عشان تجتذب الاستثمارات اللى حتعمل مصانع جديدة !! طب ما تشغلوا المصانع اللى بتقفل الاول».
وأوضح :«عشان عندنا رئيس مجلس شعب بيشتري عربيات ب 57 مليون جنية على حسابنا».
واستطرد :«عشان مش بنحارب الفساد بجد ... ده الحرامية الصغيرين اللى بنكشف عدد قليل منهم بيطلعوا سارقين ملايين .. اومال الحيتان الكبار سارقين كام ؟!».
وتابع:« أيوه فعلا احنا بقينا فقرا وبالارقام كمان ... فى اخر 3 سنين تضاعف الدين الخارجى والداخلى (يعنى اللى استلفناه فى 3 سنين اكبر من كل اللى استلفناه فى تاريخنا منذ الفراعنة) وانهارت العملة الى ثلث قيمتها وتضاعفت الاسعار (التضخم اصبح 24.3%) وكل الخراب ده حصل فى اخر 3 سنوات فقط !».
واختتم كلامه قائلًا :« طب ينفع نبقى فقرا وربنا قال علينا "خزائن الارض" ؟!!!! ... ده احنا عندنا قناة السويس وتلت اثار العالم وزراعة و 92 مليون قوى عاملة و بترول وغاز ومعادن ومناجم دهب .... لا يا ريس احنا مكناش فقرا ... احنا بقينا كده فى عصرك فقط».