السيسى: مصر تخوض حرباً حقيقية

أكد الرئيس عبدالفتاح السيسي أن مخطط مظاهرات 11 نوفمبر الماضية كان يستهدف سقوط الدولة المصرية مضيفا "كل الدنيا عملت إجراءاتها سواء بقصد أو بدون قصد لإثارة الناس في 11/11 عشان يضيعوا البلد دي.. مش عشاني أنا. أنا مش نظام. أنا الناس اختاروني. والمصريين فهموا ده وحافظوا علي بلدهم ومتحركوش".
وأوضح السيسي خلال مداخلة هاتفية لبرنامج "كل يوم" علي فضائية "On E" مع الإعلامي عمرو أديب "التحدي كان كبير ليه؟. لأن انتو ا للي اخترتوا يا مصريين. الدنيا كلها في منطقتنا كانت بتتحرك في اتجاه. كان فيه تصور معين بيتنفذ وأنتو قلتوا لأ مش هينتفذ عندنا في مصر. والدولة فيها 90 مليوناً قالوا لا إحنا مش هنعمل ده". مردفاً: "طب أنتو عارفين اللي أنتوا بتعملوه ده أيه؟. لأن اللي أنتوا بتطلبوه ده مطلب خطير جدا. وهيترتب عليه حجم كبير جدا من الخسائر وده اللي إحنا شوفناه في الثلاث سنوات ونصف واللي بنشوفه لغاية دلوقتي".
وأضاف أن الفاصل بين الرأي العام العادي والتناول الإعلامي العادي وبين الأجهزة والدولة "كبير" موضحا أن التناول دائما علي مستوي الفرد والمواطنين وهو أمر مقبول أما الأجهزة وتقديرات الدولة في اتجاه آخر.
ورداً علي سؤال الاعلامي عمرو اديب حول نجاح الامن في مواجهة الارهاب بسيناء قال السيسي: "ايوه احنا ناجحين لغاية دلوقتي. وفعلا المعدلات تراجعت بشكل كبير. وتصور واحنا بنعمل ده. احنا في حراك مستمر".
وواصل السيسي استعراض الجهود المبذولة لمواجهة الارهابيين في سيناء قائلاً: "تأمين وقدرة مافيش كلام. ومواجهة الارهاب ليه تكلفة كبيرة وما بينتهيش في يوم. والدولة بتحشد موارد كبيرة علي فرضية واحتمال. انت في سيناء بقي بتواجه مخطط واهل الشر اللي بتمول. الاموال اللي تم ضبطها في خلال ال 3 شهور اللي فاتوا ملايين من الدولارات والجنيهات. الف طن متفجرات. علي مدي ال 3 سنين اللي فاتوا تم تفجير آلاف المخازن اللي فيها متفجرات من سنوات كثيرة".
وحول مصطلح اهل الشر الذي يردده الرئيس كثيراً في خطاباته. وماهيتهم. قال السيسي: "الرئيس لما يتكلم مش كل حاجة يقولها للناس. ومهم جداً اننا ننظر إلي النسق الذي يتم فيه تداول البيانات والمعلومات. والناس عارفة من غير بيانات حجم التحديات. اللي بتقف قدامه جداً ودايماً بقولهاكم.. وحدتكم انتم يا مصريين. وكل اللي انتوا شوفتوه في ال 3 سنين اللي فاتوا بيدهش العالم كله. ومينفعش نقول اسماء دول علي الهواء".
"هتجيبلنا حقنا يا ريس"
وفي معرض حديثه مع الرئيس عن حق شهداء الارهاب. وجه اديب سؤاله للسيسي قائلاً: "هتجيبلنا حقنا يا ريس". فرد السيسي قائلاً: "هو كل ده لسه ماجبناش".
واردف الرئيس قائلاً: "مش انا اللي هجيبلكم حقكم. انتوا اللي هتجيبوا الحق بالصمود وبالنجاح. المعركة مش معركة رئيس ولا حكومة ولا جيش وشرطة بس. دي معركتنا كلنا. واللي بيتعمل في مصر بكره تشفوه. ومش بقول كدة عشان ارفع معنويات الناس".