بالفيديو..أولياء أمور مدرسة ب"طرة": "ولادنا هيسقطوا"

"إحنا 7 فصول تالتة إعدادي بيقسمونا علي فصلين، في أوضة التربية الفنية في الحوش، ومافيش أساتذة اللي فاضي بيدخلنا، يقولنا أي حاجة وخلاص، و يروحونا من المدرسة بدري، عايز ادخل اعمل استمارة الإعدادية مش عارف، أعدادنا بالمئات، والفصل يشيل 60 بالعافية"..
كانت كلمات لبعض التلاميذ في المدرسة، رافضين ذكر أسمائهم؛ خوفًا من أن يعاقبهم المدرسون، وأن يتسببوا في رفدهم من المدرسة أو رسوبهم.
وأضاف طالب: "بيشتمونا وبيهزأونا والعيال بتهرب من الحصص، المدرسة وحشة وبيضربوا العيال والعيال بتعور بعض علشان مافيش حد بيهتم بينا، المدرس بيشرح حبة صغيرين ومش بمجهود و"كتَينا" من المدرسة علشان مش بنعمل حاجة، واللي مش هياخد درس هيسقطوه ومش بيعرفوا يشرحوا".
ويقول "مصطفي"، طالب بالصف الثالث الإعدادي، محتميًا بوالدته التي تقف بجواره: "المدير قالنا ما تجوش المدرسة زي الناس اللي بتغيب، أنتوا بتيجوا ليه، ويوم لما نيجي بنمشي بعد الحصة الرابعة، نفسي أجي واحضر بس هما اللي بيمشوني".
أولياء الأمور
وتضيف والدة مصطفي: "مش بيحضر المدرسة خالص ومش مقدرتي إني اديه، دروس خصوصية، ومش هعرف أذاكر له اعمل إيه مش عارفة ليه مش راضيين يدخلوهم المدرسة، وما بيدخلوش حد المدرسة علشان اشتكي وما جربتش إني اشتكي برة".
وأنهت كلمتها موجهة رسالة إلى وزير التعليم، قائلة: "ابني من حقه يحضر المدرسة".
وتضيف ولية أمر أخرى، قائلةً: "الناظر بيبهدل التلاميذ وبيقولهم إيه اللي بيخليكم تيجوا المفروض يحضروا زي زمان، والآخر يقولوا "230" درجة علشان يدخل ثانوي عام أزاي، ومافيش حد معاه فلوس للدروس".
ويضيف علي شحاتة، عم لطالبين بالمدرسة: "ما فيش اهتمام بالتلاميذ الناظر بيمشيهم ويقولهم ما فيش حضور، وكل ما نتكلم يتهربوا مننا بحجج فاضيه، أرجوك يا وزير التعليم اهتم بالطلبة ولا عايزين تبوظوا التعليم للفقراء، من أول السنة ويدفعوا التلاميذ تروح السنتر".
يذكر أن مدرسة الشهيد عبد الخالق نبيل أبو زيد، في منطقة "طرة"، تضم المرحلتين الابتدائية والإعدادية، وتعتبر المدرسة الوحيدة في المنطقة.
شاهد الصور..
شاهد الفيديو..