حالة من الغباوة الفيروسية أصابت دماغى من كام يوم ولقيتنى مش فاهمة حاجة والدنيا ضباب والتفكير بطىء جداً بفعل أدوية الزكام.. المهم قلت ده ما يمنعشى برضه إن الواحد يتابع أخبار مصر، «هى أمى» ونشوف الدنيا زى ما هى كعادتنا كل صباح ولا فيه شىء اتغير فيها.. فتحت الجرايد.. العناوين واضحة ومفهومة بس كل عنوان لوحده واضح أنا بقى مش عارفة أربطها ببعضها.. قال لك فى العنوان الرئيسى الكبير قوى «مد قانون الطوارئ سنتين كمان» وهايخلوه عشان المخدرات والإرهاب بس.. أنا قلت ماشى.. عادى يعنى بصيت فى نفس الصفحة لقيت صور فيها نواب واقفين فى المجلس الموقر يزعقوا وهما حاطين شرايط على صدرهم مكتوب عليها «لا لقانون الطوارئ» وفى جرايد المعارضة الصحفيون ولولو والكتاب استغربوا ونواب الوطنى قالوا: ياسلام.. فيها إيه يعنى؟ ما هى إسرائيل عندها واحد مدكناه على جنب ولا إنتو يعنى أجدع من إسرائيل؟ ولا هى دوشة ومعارضة وقلة قيمة وخلاص.. ما تنكتموا بقى مليتوا البلد -الجملة الأخيرة دى من عندى أصلى لقيتها ماشية مع الموضوع يعنى- المهم ما أطولشى عليكوا.. ابنى بص لى قوى وقال لى: هو إنتى مش مندهشة من مد قانون الطوارئ سنتين كمان؟ قلت له: يا ابنى يا حبيبى.. لأ.. خالص ومش عارفة مالكوا كده إتفززتوا وفرفرتوا لما سمعتوا الخبر ده كما لو كان غير متوقع؟ طيب إيه يا إخوانا اللى جد علينا عشان الحكومة تلغى قانون الطوارئ؟ الوضع كله باقى كما هو عليه فى كل حاجة وفى كل الأشخاص وكل الوشوش بأمارة إيه يتلغى قانون الطوارئ؟ لأ.. كده يبقى نشاز والشيستيم يبوظ روقوا شوية.. حتى أمريكا رخرة مش عاجبنى كلامها.. يعنى إيه تشعر بخيبة أمل راكبة جمل عشان قانون الطوارئ كبر كمان سنتين.. دلوقتى عمره 31 وقدامه لسه لغاية 93 سنة عادى.. هما ما لهم بقى.. كل واحد خليه فى حاله وإحنا ما نحبش حد يتكلم على شؤوننا الخصوصية لأن المسألة دى حساسة وكمان الوزير بتاعنا بتاع الخارجية رد عليهم أفحمهم شوفوا قال إيه: «قال إن تعليقات هيلارى كلينتون والبيت الأبيض جانبها التوفيق لأنها فشلت فى أن ترى الجانب الإيجابى فى الخطوة الكبيرة التى تم تنفيذها لأن تقليص التدابير وغير ذلك من الأمور هى فى غاية الأهمية والإيجابية وكذلك فإن مبادرة الحكومة من الأساس لتقليص هذه التدابير تعد أمراً مفصلياً فى تعامل المجتمع المصرى مع هذا الموضوع». أظن الكلام واضح جداً ومفهوم.. أهو أنا جايبة الكلام ده بالنص من الجرايد.. وأنا عارفة إنه مفهوم وسهل جداً بس أنا عشان عيانة وعندى فيروس فى نافوخى ما فهمتش منه حاجة.. لكن اللى ما عندوش أنفلونزا وزكام وصداع ممكن يفهمه.. بصوا أنا ها أشيل الجرنال ده لغاية ما أخف وأقراه تانى ولو مافهمتوش ها أستنى لغاية ما يجيلى أنفلونزا تانية يكون سببها فيروس مختلف يمكن ساعتها أفهم ليه «تقليص التدابير يعد أمر مفصلى».. وكل قانون طوارئ وأنتم بخير وألف صحة وسعادة.
