محرقة البورصة المصرية

(أيمن) كويس إنك جيت.. السهم نزل ربع قيمته، أبيع وأوقف خسارة؟- (عمرو) إوعى.. دى حركات بيعملوها عشان اللى قلبهم خفيف زيك يبيعوا ويلموا الأسهم بتراب الفلوس- (أيمن مستوثقا) متأكد؟- (عمرو فى ثقة) طبعا.. دى خبرة عشر سنين فى البورصة - (أيمن فى سرور) روح يا شيخ الله يسترك.
أغسطس 2008
(أيمن فى تعاسة) السهم بقى بنص التمن- (عمرو فى استهتار) آه بسبب موضوع هشام طلعت وسوزان تميم- (أيمن حانقا) يعنى هو يحب وأنا يتخرب بيتى!- (عمرو فى ثقة) اثبت واوعى تفكر تبيع. كلها يومين والبورصة كلها تعلا تانى وسهمك معاهم - (أيمن سعيدا) تصدق إنى كنت حابيع! مش عارف من غيرك كنت حاعمل إيه؟
سبتمبر 2008
(أيمن حزينا) السهم بقى بربع التمن.. يا ريتنى بعت وقتها - (عمرو متهللا) مبروك يا أيمن.. ده وقت الشرا.. (أيمن مذهولا) مبروك! شرا!- (عمرو واثقا) إنت تشترى نفس السهم لغاية آخر مليم عندك وتعمل متوسط أسعار، وعند أول ارتفاع تبقى كسبت، فهمت؟- (أيمن فى منتهى الانبساط) تصدق إن الفكرة دى عمرها ما كانت تخطر ببالى!- (عمرو يفطس من الضحك) أنا أنقذتك من هلاك محقق. (أيمن وقد دمعت عيناه تأثرا) أوعدك إنى مش حاخلى معايا ولا مليم. حاشترى بيهم كلهم. إنت فعلا نعم الصديق.
أكتوبر 2008
(أيمن زائغ النظرات) أنا سمعت نصيحتك واشتريت تانى، والسهم بقى عشرة فى الميه من السعر اللى اشتريت بيه - (عمرو) ده بسبب الأزمة العالمية، لكن ما تقلقش، الثروات بتُصنع وقت الأزمات وأنت على وشك تجنى الثمار. (أيمن وقد استراح باله) يا سلام.. أنا سعيد جدا إنى حاجنى الثمار. تصدق إنى كنت فاكر إن بيتى اتخرب!- (عمرو يفطس من الضحك) مش قلت لك.. اللى ما بيفهمش فى البورصة يقول (يقاطعه أيمن بصوت عال وقد أفلتت أعصابه) عدس عدس عدس.
نوفمبر 2008
(أيمن فى سكرات الموت) أنا فلست. السهم بقى ببلاش. معدش يجيب حتى أكلة سمك. (عمرو فى لهجة الواعظ) ياما نصحتك ما تدخلش البورصة ما سمعتش كلامى.. ياما قلت لك البورصة مطحنة، ركبت راسك وأصريت، استفدت إيه دلوقت؟ ضيعت فلوسك - (أيمن يفغر فاه فى ذهول عاجزا عن النطق) - (عمرو فى تشف) معاك كام دلوقت؟- (أيمن وهو يغرغر) ولا مليم. بقيت على الحديدة.
(عمرو يجاهد كى يكتم ضحكته) بذمتك حد يدخل البورصة بكل اللى معاه؟، دلوقت ماقصادكش غير إنك تستلف - (أيمن وهو يطلع الروح) وهو فيه حد بيسلف حد؟- (عمرو غاضبا) جرى إيه يا أيمن؟. يا أخى الناس لبعضها( أيمن فى أمل) كده! طب سلفنى - (عمرو على الفور) افتكرت مشوار مهم. سلام.