مسحراتى مصر البهية..بلاش معاكسة

اصحى وسبّح رب البّرية
مشيت ارتّل وانشد واجوّد
وصوتى يجرى بين النواصى
هنا بانقّر.. هنا باعوّد
هنا باحوّد عن المعاصى
لو كنت بحرى
لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البَرية..
■ ■ ■
مسحراتى ساكن ف عطفة
وعندى جارة غاوية الملاطفة
مديت خيالى.. وقطفت قطفة
طلع لى ورد وعسل مصفى
■ ■ ■
صبية أجمل من الحورية
تقولش قشطة ومهلبية
جمالها طاير كأنه غية
ورموش عينيها واقفين ف صفى
■ ■ ■
القد جامح والاسم سلمى
والرمش قادر والعين مسالمة
وليها نظرة بمليون مكالمة
يا روحى روحى.. وحواليها لِفى
■ ■ ■
أنا قولت اجرب سكة مُعاكسة
حبة جراءة على مشاكسة
قالتلى وكسة عليك ونكسة
هو أنت منهم؟! مُخك مِطفّى؟!
■ ■ ■
بصراحة يعنى حسيت بخيبة
حسيت بإنى عملت عيبة
ما فضلش عندى- قدامها- هيبة
وفوق دا كله.. قفلت ملفى
■ ■ ■
حسيت بكسفة لكن مهولة
أصل المعاكسة ما فيهاش رجولة
ولا التحرش سكة بطولة
حسيت بإنى عايز تخفّى..
■ ■ ■
حكايتى نكتة ماهيش حقيقة
عايز أقولك شوفلك طريقة
تكون عفيفة وتكون بريئة
وتخلى طرح الغرام يوفى
■ ■ ■
دى كل بنت ف بلدنا أختك
وبكرة بنتك أو حتى زوجتك
ارجع لعقلك وافهم رجولتك
واللى عملته خلاص يكفّى
■ ■ ■
البنت نعمة لازم نصونها
ومستحيلة الحياة بدونها
فكّر ف أمك ونور عيونها
تاخد وسام احترام بكفى
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
■ ■ ■
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
■ ■ ■
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب