المتهم بقتل نيرمين خليل: حواري مع القتيلة استمر «دقيقة» وانتهى بالجريمة (حوار)

دائما يكون المتهم فى جرائم القتل لديه معلومات كثيرة عن «القتيل» أو «ضحيته».. ويمتلك مبررات وأسبابا لارتكاب الجريمة ويعلم خط سيره ويرصد تحركاته.. لكن فى قضية مديرة الموارد البشرية نيرمين خليل الأمر كان مختلفا.. المتهم لا يعرف ضحيته.. الحوار بينهما لم يستمر سوى دقيقة واحدة انتهى ب«صرخة النهاية» للضحية وهروب من مسرح الجريمة للمتهم.. هروب دون دليل أو خيط رفيع يقود إليه.. هروب استمر أكثر من 42 يوما.
أنا بصراحة «مانمتش» هكذا يتحدث المتهم .. من ساعة الجريمة ما حصلت.. أو نومى كان «صعب وخفيف».. مشهد الدم بيطاردنى.. أنا من 6 شهور قررت إنى أسرق بالإكراه.. لكن موضوع «الدم» مستبعده .. عندى 26 سنة مقيم فى منطقة بولاق الدكرور بالجيزة.. حاصل على دبلوم صناعى.. أنا أصلا من سوهاج.. وبالتحديد قرية «الطوايل» فى مركز ساقلتة.. ومحمود شريكى فى جريمة القتل.. من قرية جنبنا هى «الحاجر».. دى القرية اللى اتصور فيها فيلم الهروب بتاع أحمد زكى يضحك لكن أنا عايش هنا من 20 سنة.. أنا وأسرتى.. أنا أكبر إخواتى.. ولدين وبنتين ..بس أنا معنديش أولاد.. متجوز من سنة فاتت.
أنا شغال سواق ميكروباص اشتريته قسط على خط بولاق الدكرور مهندسين.. و«شريكى» محمود معايا على الخط نفسه.. من 6 شهور اتعرفنا.. على تاجر مخدرات من الإسكندرية.. كنا بنشترى منه حشيش.. كنا بنتاجر فيه.. المهم هو عرض علينا نجيب له عربيات جيب شيروكى وناخد بدلها الحشيش.. واشتريت بندقية ب9 آلاف جنيه.. وكنت باستخدمها فى سرقة العربيات.. وهى اللى قتلت بيها «الست» بتاعة «سفنكس».. بس والله الطلقة طلعت منى غلط.. يرتعش المتهم.. ويقول «بردان».. ويتدخل الرائد سيد شقرة والنقيب محمد شادى: «فيه جاكيت هيجى لك دلوقتى يا سعد».
أنا ومحمود يواصل المتهم اتفقنا على سرقة العربيات وبيعها للتاجر ده.. واخترنا مناطق قريبة من المحور.. عشان ناخد العربية ونجرى بيها على إسكندرية مباشرة.. وده قبل ما صحابها يبلغوا، أو الشرطة والكمائن تاخد رقمها وتوقفنا.. وده عملناه فى 3 مرات قبل كده.. وبعنا العربيات وجبنا حشيش وبعناه.. 3 جرائم سرقة بالإكراه من غير دم.. كنت أدخل على الضحية أى ضحية وأضرب طلقتين فى الهواء.. كان يجرى ويسيب العربية.. مرة من أمام قرية فى الشيخ زايد.. وده بيحصل عند مطبات أو منحنى.. أو نجبر الضحية إنه يقف.
فى المرة الأخيرة.. خرجت أنا ومحمود واستأجرنا عربية ملاكى.. وكنا بنلف فى «محيط» منطقة المهندسين وميدان لبنان.. والساعة كانت حوالى 6 الصبح أو بعد كده بشوية.. شفنا عربية «شديدة».. وحاولنا نوقف صاحبتها.. بس هى «سحبت» والعربية ساعدتها.. ومشينا وراها حوالى 300 متر.. وفجأة هى وقفت عند مطب.. وواضح.. إن فيه حاجة وقعت منها فى الدواسة.. لقيتها وقفت فجأة.. أنا نزلت من العربية.. وبسرعة مسكت باب عربيتها بإيدى الشمال.. كان طبعا «مسوجر».. وقلت لها افتحى الباب وانزلى.. هى خافت.. وداست بنزين بقوة.. وأنا إيديا اتحركت وصباعى جه على الزناد.. وخرجت طلقتين.. واحدة منهم جت فى سقف العربية وواحدة جت فى دماغ الضحية.
الناس خدت بالها.. وفجأة لمحت مدرعة كانت واقفة على بعد 100 متر.. وجرينا بسرعة بالعربية. بصراحة.. كملنا حياتنا عادى.. ننزل شغلنا ونركب الميكروباص.. بس أنا سمعت إن الست دى ماتت فى الحال.. وإنها محترمة جدا.. وعلاقتها بالناس كويسة وعندها بنت.. أنا مكنتش أقدر أنام.. كان المشهد صعب على.. أنا فى الأول قلت إنى هاسرق.. لكن متوصلش ل«روح» بنى آدم.. وكان ممكن أقتل قبل كده.. كنت باطلع إسكندرية أنا ومحمود عشان ننسى اللى حصل.. وبصراحة محمود كان «شقى» شوية.. واتمسك آداب.. وطلع قرار بحبسه 4 أيام واتجدد له 15 يوم فى 15 يوم وأنا زرته مرة واحدة.. بس متكلمناش فى قصة القتل لحد يسمعنا.
أنا جيت هنا يقصد نقطة شرطة المهندسين برجلى.. كنت فى سرقة من السرقات لقيت جهاز «آى باد» فى عربية.. وبعته لواحد صاحبى.. وفجأة يوم الأربع اللى فات.. لقيت الشرطة قبضت عليه.. وهو مالوش ذنب.. وقلت آجى على النقطة عشان هو يطلع.. وقابلت النقيب مصطفى يقصد مصطفى خليل رئيس نقطة المهندسين، والعميد محمود خليل مفتش المباحث .. وقلت لهم إن صاحبى ده ملوش علاقة ب«آى باد».. وأنا لقيته فى الشارع.. وبعتهوله.. وصاحبى مشى من النقطة.. وبدأت المناقشة.. بس انت ملقتوش فى الشارع.. صاحبته قالت إنه كان فى عربيتها واتسرقت بالإكراه.. وجابوا صاحبة العربية.. واتعرفت علىّ.. والمناقشة تطورت.. ولقيت ضباط برتب كبيرة جت واتلموا علىّ.. عرفت إنهم طارق بيه اللواء طارق الجزار نائب مدير المباحث وواحد ب«شنب» و«يخوف» يقصد العميد عرفة حمزة رئيس مباحث الشمال.
وبدأت الأسئلة.. طب وده كان إمتى.. مين كان معاك.. وسلاحك فين.. حاولت أنكر.. والأسئلة زادت.. وقلت لهم إنى ومعايا صديقى محمود بنسرق عربيات شيروكى بالإكراه.. ومنها فى الشيخ زايد والمهندسين.. وأنا كنت عايز أخلص ضميرى فى قصة القتل، وبعد ما الأسئلة زادت والحصار زاد قلت لهم على القتل.. وحكيت قصة التاجر بتاع إسكندرية.. وقلت على مكان السلاح اللى ارتكبت بيه الجريمة. دلوقتى.. أنا مش خايف.. أنا كنت «تعبان» فى الشهر ونص اللى فاتوا بعد «القتل».. والحكم اللى يصدر ضدى.. أنا راضى بيه.. معنديش مشكلة. وعن باقى الجرائم التى ارتكبها وسيعرض على نيابات أخرى قال: «مش كتير».