النيل.. يا ساقية

مسحراتى مصر البهية
اصحى وسبّح رب البَرية
مشيت ارتل وانشد واجوّد
وصوتى يجرى بين النواصى
هنا بانقّر.. هنا باعوّد
هنا باحوّد عن المعاصى
لو كنت بحرى
لازم اقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر واسحَّر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البَرية..
■ ■ ■
مسحراتى والنيل.. دا نيلى
ما بين صحارى الزمان دليلى
وإيه جرالى وإيه جراله؟!
كنت اشتكى له.. بقى يشتكى لى
رسم ملامحى بحسن خطه
زرعت قلبى ف طمى شطه
بلاد تشيله وبلاد تحطه
وبلاد تسبح بنور جماله
يطوف ويسعى.. وينتهى لى
وإيه جرالى وإيه جراله؟!
كنت اشتكى له.. بقى يشتكى لى
النيل يا ساقية.. سقانى حبة
حنان.. وحبة عشق ومحبة
وف نن عينى لونه استخبى
يحس روحى اللى محتاجة له
يضحك.. يرشرش على نجيلى
وإيه جرالى وإيه جراله
كنت أشتكى له.. بقى يشتكى لى
حبيبى »حابى«.. أحلى الأسامى
عيونه تصحى على ابتسامى
أنظرله.. نظرة.. يسكن مسامى
أيام حياتى متعطرة له
فيضان جماله يسعد نخيلى
وإيه جرالى وإيه جراله؟!
كنت اشتكى له.. بقى يشتكى لى
■ ■ ■
النيل تجلى ف مصر وتمصّر
وقرالها آية مما تيسّر
طب مين يوضح ومين يفسر
مين اللى عايز يخدش جلاله
ومين ف صالحه يعطش سبيلى
وإيه جرالى.. وإيه جراله؟!
كنت أشتكى له.. بقى يشتكى لى
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
فى الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق مافاتها
تطلب هداية وتقول يا رب
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب