عباسية واحد.. خط الثورة

فى صمت جنائزى، افتتح خط المترو «عباسية - عتبة».. لا حضره رئيس جمهورية، ولا رئيس وزراء.. الناس نفسها مسدودة، فقدت طعم الفرحة.. لا ندرى إن كانت الأحداث؟.. أم لأنه خط العباسية؟.. خط جديد للمترو، يعنى نقلة كبرى.. فلماذا كان الصمت، وكان الحزن؟.. أين روح الثورة، وأين روح التحرير؟.. إلى الحوار:
- تعرف ليه غاب «الجنزورى» عن افتتاح مترو العباسية؟!
- مش عارف.. بيقولوا إجراءات أمنية؟!
- تفتكر يعنى جت على رئيس الوزراء، وسط الأمن ده كله؟!
- متهيأ لى عشان اسمه خط العباسية.. ههههه؟!
- ههههه.. خاف من الثوار، ولا من العباسية؟!
- من الاتنين أكييييييد.. بس الثوار أولاً!
- أنا شايف الحكاية ماكانتش مستاهلة حضوره.. المفروض الوزير المختص!
- تقصد كفاية يحضر وزير النقل مثلاً؟!
- ده الشىء الطبيعى.. مينفعش الرئيس يفتح كوبرى، ورئيس الوزارة يفتح دورة مياه!
- أيوه بس «الجنزورى» أناب عنه حسن يونس.. يعنى أنا موجود!
- ده بقى نظام فرعونى.. تكريس فكرة الفرعون.. لا شىء بدونى!
- هنا تكمن المشكلة.. لا توجد ثورة!
- أنا الحكومة.. أنا الكبير.. وسع الطريق!
- كنت فاكر الثورة غيرتنا؟.. وكنت فاكر كل واحد هيشوف دوره الأصلى؟!
- على ذكر الثورة.. وزير النقل جلال السعيد افتكر الثورة امبارح!
- تقصد لما قال هيطلب من مجلس الوزراء تسمية الخط ب«خط الثورة»!
- صراحة لقطة حلوة.. ده بقى الوزير الثورى!
- الثورية إننا نعمل حاجة باسم الثورة.. ده كان خط جاهز من نظام المخلوع!
- يعنى إيه، هيه مش فلوسنا؟.. هيه كانت فلوس أبوه؟!
- ما اختلفناش.. فلوسنا طبعاً.. لكن مفيش حاجة عملناها للثورة حتى الآن!
- ااااااه.. لازم نعمل مشروعات جديدة.. وننتقل من الميدان للمصنع!
- عليك نور (!).. إحنا ما شفناش مشروع، ولا محل باسم الثورة!
- هو ده الفارق بين ثورة 25 يناير وثورة 23 يوليو!
- مع أن الأولى بدأت حركة ضباط.. وبعد كده تحولت لثورة شعبية!
- حاجة غريبة فعلاً.. لا كوبرى ولا شارع ولا حتى قهوة؟!
- ولا فيلم سينمائى، ولا أغانى وطنية.. هوه فيه إيه؟!
- فيه إن الشعراء والمخرجين والفنانين فلوووول.. خارج الثورة!
- يعنى كلهم بتوع العهد البائد؟.. مش معقووول!
- عارف، الفنان مش بتاع حد.. بس يمكن الحكاية عاوزة وقت!
- فى ثورة يوليو شفنا أم كلثوم، وعبدالوهاب، وعبدالحليم، وكمال الطويل والأبنودى!
- عندك حق.. إحنا كمان شفنا أفلام تسجيلية عن الثورة!
- عملها الشباب.. ما حدش كان من الكبار، لأنهم فلول!
- قصدك همه مش مع الثورة.. ولا الحكاية عاوزة وقت؟!
- فيه حاجات كتير متلخبطة.. الثورة كمان متلخبطة!
- يا راجل.. عندك رئيس فى السجن، وحكومة فى طرة.. وبرلمان جديد لانج!
- اااااااه.. ربنا يستر.. ممكن بكره يطلعوا براءة؟
- براااااءة.. يا نهار اسود، طيب ودم الشهداء؟!
- تيجى نجرب مترو العباسية بمناسبة الافتتاح؟!
- ونروح فين يا مجنوووون؟
- العباسية.. عباسية واحد.. هههههه!