«فن حقيقي».. أسما شريف منير تشيد بفيلم «دخل الربيع يضحك»

أشادت الإعلامية أسما شريف منير، بفيلم «دخل الربيع يضحك»، مؤكدة أنه لمسها شخصيًا بسبب صدقه وواقعيته، موضحة أن الفيلم يعتمد فلسفة الفصول الأربعة.
وكتبت أسما عبر حسابها على إنستجرام: «أنا بعشق الربيع، أنا مولودة في شهر أربعة، وبحس ده اللي بيخليني شخص متفائل، بحب البني آدمين بكل تعقيدهم، بكل تناقضهم، وباللي بيخفوه أكثر من اللي بيظهروه».
وأكدت: «فيلم دخل الربيع يضحك لمسني جدا، يمكن عشان هو عنا كلنا، عن البدايات اللي بتحسها مزهرة، بس عمرها ما بتكمل زي ما بدأت، أربع حكايات مختلفة، كل واحدة فيهم بتنتهي نهاية موجعة، مش درامية، لأ حقيقة».
وأشارت: «الممثلين في الفيلم مش محترفين، وده يمكن أكثر حاجة خلت كل لقطة صادقة أوي، وجمل بسيطة بس موجعة، عشان طالعة من ناس عايشينها مش بيأدوها، الفيلم واخد فلسفة الفصول الأربعة بيتكلم عن الربيع اللي بيضحك في وشك، بس جواه خريف بيستني دوره، صورة ساكتة المزيكا قليلة، بس الإحساس تقيل وجميل، بيوجعك بس يخليك تحب وجعك».
ولفتت: «مشهد ورا مشهد بتحس إن الكاميرا بتتفرج على الحياة، وهي بتكشف اللي جواه نفسها وده بالنسبالي فن حقيقي، الفيلم كسب جايزة النقاد في مهرجان القاهرة السينمائي الدولي، وده مش صدفة لأنه بيقدم تجربة نادرة صادقة، بسيطة، خام، ومليانة روح».
واختتمت: «دخل الربيع يضحك، ضحك بس بدمعة، ومن كتر ما هو حقيقي، بيخليك تفتكر نفسك، روحوا اتفرجوا عليه».
أبطال فيلم دخل الربيع يضحك
فيلم «دخل الربيع يضحك» من كتابة وإخراج نهى عادل، ومن بطولة سالي عبده، ومختار يونس، ورحاب عنان، وريم العقاد، وكارول عقاد، ومنى النموري، وسام صلاح، وروكا ياسر، وإنتاج كوثر يونس وأحمد يوسف، ومنتج مشارك لورا نيكولوف وسمر هنداوي وساندرو كنعان، ومديرة تصوير سارة يحيى، ومونتاج سارة عبدالله، وتسجيل صوت مصطفى شعبان، وميكساج الصوت أحمد أبوالسعد، وتلوين سامي نصار وأحمد شافعي، ومهندس ديكور سلمى تيمور، ومصممة أزياء مشيرة الفحام، ومخرج منفذ ميسون المصري، ومونتاج تتر: ماركوس عريان.