بعد استخدام صورهما بالAI.. ألبرت جميل يعتذر لحنان مطاوع وريهام عبدالغفور

اعتذر مدير التسويق ألبرت جميل، للفنانة حنان مطاوع وبعض النجوم الذين استخدمهم في مقطع الفيديو المصنوع بتقنيات الذكاء الاصطناعي، مع ذويهم المتوفين، ذلك بعد اعتراض حنان مطاوع على تقديم محتوى بهذا الشكل دون الاستئذان من أصحاب الشأن.
اعتذار ألبرت جميل ل حنان مطاوع وريهام عبدالغفور
وكتب ألبرت جميل عبر حسابه الرسمي على «فيسبوك»: «اعتذار رسمي.. أنا بقدّم اعتذار رسمي لكل الأساتذة والفنانين الكبار اللي ظهروا في فيديو #رسالة_من_العالم_الآخر، النجمة حنان مطاوع: انا بحب اعمالك جدًا، وطريقتك المحترمة جدًا في الاعتراض تدرّس».
وأضاف: «النجمة ريهام عبدالغفور: انا آسف لحضرتك… شغلي في ال Digital Marketing خلاني أعمل Hook في أول الفيديو، بس للأسف جه على حساب مشاعرك من غير قصد، كنت متخيل إن إظهار الفنان أشرف عبدالغفور وهو مبسوط وبيتواصل معاكي من الجنة إن شاء الله هيكون عزاء، بس طلع ده ممكن يضايق، وانا آسف، وأي نجم تاني ظهر في الفيديو وضايقه الموضوع… انا آسف جدًا».
وتابع: «توضيح مهم: أنا غلطت إني ما استأذنتش من أي فنان أو من أهاليهم قبل ما أنزل الفيديو، بمنتهى الأمانة مكنتش متوقع خالص إن ده يكون رد الفعل، بالعكس كنت فاكر إن الكل هيبقى مبسوط إننا بنحيي ذكرى ناس كلنا بنحبهم، بس زي ما النجمة حنان مطاوع قالت: حتى لو النية كويسة، الفكرة ممكن تفتح أبواب لناس نيتهم مش كويسة يستغلوا الفنانين بشكل وحش، والحقيقة اللي شجعتني أعمل الفيديو هو إن الفترة اللي فاتت انتشرت صور كتير معمولة بال AI لفنانين بيتصوّروا وكأنهم بيحضنوا أحبابهم اللي توفوا، وشفنا فنانين نفسهم بيشيروا الصور دي ومبسوطين بيها. انا بس حاولت أطور الفكرة دي في شكل درامي متحرك برسالة هادفة ومؤثرة».
واستكمل: «عاوز أوضح كذا نقطة: كل المشاهد اللي ظهرت في الفيديو كانت مبنية على كلام الفنانين نفسهم في لقاءات عامة للجمهور، يعني مثلًا: الفنانة رانيا فريد شوقي قالت في لقاء إنها كانت بتحب تلعب كوتشينه مع العملاق فريد شوقي، وكان دايمًا بيغش ويهزر معاها… فانا جسدت المشهد ده زي ما هو، من غير ما اخترق حياتهم الخاصة، والفيديو كان موجه لثلاث فئات: الفنانين وأسرهم، كإحياء ذكرى، أي حد فقد شخص عزيز، علشان أوصّله رسالة إن المتوفى مرتاح وحاسس بيه، والناس اللي لسه ما مروش بتجربة الفقد، وده علشان أقولهم يعملوا ذكريات مع اللي بيحبوهم قبل فوات الأوان».
وأضاف: «الفيديو عامل تفاعل كبير: أكتر من 7000 شير، وحوالي 1000 كومنت… منهم ناس مبسوطة جدًا بالفكرة، وناس معترضة يعني باختصار في انقسام، ومش سهل يتقال هو حلو ولا وحش، ومن الإيجابيات الكبيرة اللي لمستني فعلًا: كمية الترحم اللي حصلت من المشاهدين على كل النجوم والمتوفين اللي ظهروا في الفيديو، وده في حد ذاته شيء محترم ومؤثر جدًا».
وتابع: «بالنسبة لل AIعارف إن موضوع ال AI هو أكتر حاجة مضايقة، وده طبيعي جدًا التطور اللي حاصل بيخلي أي فنان ممكن يلاقي نفسه في مشهد معموله AI من غير إذنه. وده لازم يتقنن ويتنظم علشان يحافظ على حقوق الفنانين. انا شخصيًا الفيديو اللي عملته مش تجاري ولا هادف للربح، وكان واضح إنه مش واقعي 100٪، بس برضه لازم ناخد ده كجرس إنذار لأي أعمال شبه كده في المستقبل».
وختم ألبرت حديثه: «في الآخر أنا باعتذر من قلبي لكل حد اتضايق من الفيديو وحابب أختم بتعليق من واحد من الجمهور: (أستاذة حنان مطاوع مش محتاجة حتى AI… رهيبة في التمثيل على الطبيعة وكمان في ال AI)».
اعتراض حنان مطاوع على استخدام صورها بالذكاء الاصطناعي
يذكر أن الفنانة حنان مطاوع كانت قد أعربت عن استيائها من استخدام صورتها وصورة والدها الراحل، الفنان الكبير كرم مطاوع، في أحد الفيديوهات المصنوعة بتقنية الذكاء الاصطناعي، دون الرجوع إليها أو أخذ موافقتها.
وكتبت مطاوع عبر حسابها على «فيسبوك»: «صحيت من كام يوم على فيديو إنساني تم استخدامي فيه أنا ومجموعة من زملائي ب ai واحنا في لحظات مؤثرة مع أبي الله يرحمه ومع أهالي زملائي المتوفين الله يرحمهم جميعا في فيديو مؤثر وكان اهلنا بيبعتولنا رسالة من العالم الآخر، ماعنديش شك في نية صانع المحتوي، ولكن.. هل من حق أي حد انه يستخدم صورتي وهيئتي وصورة بابا دون الرجوع لي؟».
وأضافت: «زمان لما كانوا بيحبوا يستخدموا أصواتنا أو صورنا حتى في الكرتون كان بيتم التعاقد معنا، هل عادي اني اصحي في يوم ألاقي نفسي في فيلم ضد قناعاتي؟ ما هو طالما عادي أن يتم استخدامي دون علمي أو الرجوع لي في فيديو إنساني مؤثر يبقي ينفع بردو استخدامي دون علمي في أي شيء آخر».
وتابعت: «جميل اننا نستخدم التكنولوجيا في فايدة الناس لكن اعتقد اللي ابتدأ يحصل هو سرقة وانتهاك حقوق وسلب حقي حتى في الموافقة أو الرفض، النهارده بشكل إنساني الله أعلم بكرة حيبقي ازاي».
واختتمت حديثها قائلة: «الخلاصة.. أرفض وبشكل قاطع وضع شكلي أو صورتي وصوتي، أو وضع صورة أبي الله يرحمه وصوته، أو صورة أو صوت أمي ربنا يطول عمرها ويمنحها البركة والصحة في أي عمل فني أو إعلامي أو صحفي دون الرجوع لي والموافقة كتابيا عليه، وشكرا وآسفة للإطالة».
اقرأ أيضًا:
بسبب صورة مع والدها.. حنان مطاوع: الذكاء الاصطناعي سرقة