«يخاطبني السفيه بكل قبح».. رسائل نارية من خالد الغندور بعد تصريحات سيد عبدالحفيظ

علق خالد الغندور نجم الزمالك السابق، على التصريحات الأخيرة التي أدلى بها سيد عبدالحفيظ مدير الكرة السابق بالنادي الأهلي ضده، مشيرًا إلى انتقاده إحدى القنوات العربية.
وكان سيد عبدالحفيظ صرح ساخرًا: «خوان ألفينا في شوية من خالد الغندور يمكن بس دمه مش تقيل زي خالد».
وقال خالد الغندور في تصريحات عبر قناة «المحور»: «ربنا سبحانه وتعالى يقول «وإذا خاطبهم الجاهلون قالوا سلاما»، دايمًا خطاب ربنا لينا وتكليفاته بتكون هي الحل في أي أزمة».
أضاف: «أي إنسان عاقل متربي بيضمن إنه يملك نفسه ويملك لسانه.. طب هل تقدر تملك لسان غيرك؟ مستحيل علشان كده ربنا بيدينا الحل نعمل أي لو حد أخلاقه سمحتله إنه يخاطبنا بجهل هل ننزل لمستواه لا طبعًا الرد بيعكس قيم دينا».
وتابع: «كمان المتنبي وكلنا عارفين قيمته بيقول «وإذا أتتك مذمتي من ناقصٍ، فهي الشهادة لي بأني كامل».
وأكمل: «بدون خوض في تفاصيل وأسماء أشخاص عندي تساؤل ياترى المنصة الإعلامية زيها زي البيت والشارع والقهوة ولا ليها أصولها وبروتوكولاتها الخاصة».
وزاد: «مش معقول ندخل على الناس بيوتهم علشان نشتم أو نتنمر أو نلقح بالكلام أو نكيد ونحفل.. الإعلام بيرشد الناس وبيعلمهم».
واستطرد: «أنا بدأت الموسم وقولت أفرح بفريقك من غير تجريح هزر مع صحابك حتى لو بتحفيل دمه خفيف، ومش معنى إن موضوع عابر ميقلش من قيمتي أبدًا إني هتغير، لأن الغلط بيقل من قيمة الغلطان، خصوصًا إنه ميلاقيش مدير حوار يرده على اللي هو بيعمله، ولا زملاء ملعب ولكن بكل بساطة بيشاركوه في الغلط».
وأتم: «كمان الأوحش لما تكون قناة كبيرة ومحترمة بدل ما تمنع فيديو مسييء وفيه تنمر لا تنزله وبالعنوان علشان خاطر التريند، والأهم إن يكون في خصوصية زيادة وبجدد دعوتي لنبذ التعصب وإعلام موضوعي يقوم على الأمانة والمتعة».
اختتم بقول الإمام الشافعي «يخاطبني السفيه بكل قبح فأكره أن أكون مجيبًا.. يزيدُ سفاهةً فأزيدُ حلما كعودٍ زادهُ الإحراقُ طيبا».