تكريم مرتقب ومطالب بالإنقاذ.. نجوم الفن يساندون شيرين عبد الوهاب بعد أزمة حفل مهرجان

حرص عدد كبير من نجوم الفن في الوطن العربي على تقديم رسائل دعم للفنانة شيرين عبدالوهاب، بعد تعرضها لموجة من الانتقادات الحادة عقب حفلها الأخير في ختام مهرجان «موازين» بالمغرب، مؤكدين أنها فنانة كبيرة وصاحبة قيمة فنية لا يمكن تجاهلها، داعين إلى احتوائها ومساندتها بدلًا من الهجوم عليها.
غادة عبدالرازق: «موهبة ماشية على الأرض»
الفنانة غادة عبدالرازق نشرت عبر خاصية «الستوري» على حسابها ب«إنستجرام» رسالة قالت فيها:«مليون سلامة عليكي حبيبتي، ونورتي المهرجان.. بنحبك يا موهبة ماشية على الأرض.. القافلة تسير».
عمر السعيد: «كل الحب والدعم لمغنيتنا الأيقونية»
في السياق نفسه، عبّر الفنان عمر السعيد عن تضامنه عبر إنستجرام أيضًا قائلًا: «كل الحب والدعم لمغنيتنا الأيقونية».
شيماء سيف: «كفاية قسوة.. كلنا لينا زلات»
أما الفنانة شيماء سيف، فشاركت مقطعًا لشيرين وهي تتجاوز خطأ في الكلمات خلال الغناء، وعلقت قائلة:«شيرين حبيبتي النجمة صاحبة الصوت الرائع.. الفيديو ده علشان يبان إنها مش بتغني بلاي باك، وحتى لو غنت أول أغنية وهي متوترة المفروض منجلدهاش كده».
وأضافت:«اعتبروها متوترة لأنها بقالها كتير مقابلتش جمهورها.. إحنا بقينا قاسيين جدًا، أرجوكم كفاية.. كلنا لينا وقعات وذلات.. دي نجمة المفروض نفتخر بيها ونشجعها، مش نكرهها في عيشتها. شيرين يعني مشاعر، يعني 'عودتني الدنيا'، يعني 'آه يا ليل'».
تامر حسين: «بلاش تطاول غير مبرر»
الشاعر تامر حسين كتب عبر منصة «إكس»:«تفتكروا شيرين ما تستحقش تظهر بأفضل شكل؟ واضح إن صوتها كان مجهد، لكنها بتحاول وبتعافر وواحشها المسرح. من حق الجمهور يسمعها بأفضل شكل، لكن بلاش انتقادات قاسية وتطاول غير مبرر.. دي بني آدمة وبتحس».
وتابع:«شيرين مرت بظروف صعبة جدًا.. الكلمة الطيبة صدقة، مش بقول نافق، بس كن إنسان».
نوال الزغبي: «صوت لن يتكرر»
الفنانة نوال الزغبي غرّدت عبر «إكس» قائلة:«سلامة قلبك.. كنت حاسة فيكي قديش مشتاقة للمسرح ولجمهورك الكبير، ومع هيك جمهورك بيحبك ورح يضل حدك.. كلنا منحبك وحدك، صوت لن يتكرر».
مي كساب: «أنقذوا شيرين»
أما الفنانة مي كساب فكتبت عبر حسابها:«شيرين محتاجة يد عليا تتدخل لإنقاذها والحفاظ عليها كثروة وصوت مصر.. إلى من يهمه الأمر، أنقذوا شيرين من نفسها ومن اللي مش أمناء عليها».
هالة صدقي: «براڤو أنك احترمتي موعد الحفلة رغم تعبك»
الفنانة هالة صدقي نشرت عبر «إنستجرام» قائلة:«لو كانت شيرين اعتذرت لمرضها كنتوا زعلتوا، ولو طلعت وهي مش جاهزة لجمهور ذواق زي جمهور المغرب، زعلتوا برضه. ثقتي في الجمهور المغربي إنه هيقولها سلامتك ومنتظرينك أقوى. براڤو يا شيرين أنك احترمتي موعد الحفلة، وكلنا في انتظارك في أفضل حال».
مصطفى كامل: «تكريم قريب داخل النقابة»
من جانبه، كتب نقيب الموسيقيين مصطفى كامل عبر فيسبوك:
«أعلن دعمي الكامل ومساندتي لأختي وزميلتي الفنانة شيرين عبدالوهاب، وبأمر الله قريبًا سيتم تكريمها داخل نقابة المهن الموسيقية، تقديرًا لمشوارها الفني الراقي والمشرف».
هاني عادل :«غناء ب البلاي باك العالم كله بيعمل كده»
وكتب هاني عادل عبر حسابه على «فيس بوك»: «علشان بس تخلص الموضوع ونبان برضه إننا ناس فاهمين في المزيكا بشكل حقيقي أو اللي حابب يعني يبين انه فاهم ومذاكر وكده، هعملكم فيديو عن الفرق بين play back، وbacking tracks، بس الناهيه يعني أنا دخلت شوفت حاجات من الحفله قبل ما اكتب شيرين كانت بتغني بشكل حقيقي مكانش صوتها متسجل والدليل على كده أنها لما كانت بتغلط كانت بتوقف المزيكا لان في backing tracks الاغنيه هتبدأ لازم العازفين والمطرب يبقوا حافظين الدخول والموسيقيين حافظين كل المفاتيح بالمللي لان الغلطه مفيهاش رجوع».
أضاف: «يعني الفرقة لما تكون بتلعبب لوحدها ممكن يلحقوا الغلطات ممكن يعيدوا ويزيدوا في الاغنيه لكن مع ال backing tracks الفرقه بتلعب والمغني بيغني بشكل حقيقي وبيكونوا سامعين في ودنهم العد وال tempo وبعض الارشادات في الأماكن اللي ،ممكن يكون معاهم ايقاعات الكترونيه زياده صوت بعض الكورال وكلها حاجات علشان تحسن الكواليتي على المسرح وتخليه بنفس الكواليتي زي الالبوم».
تابع: «ومصر كلها بتعمل ده، ايوه مصر كلها، والعالم؟ اه معظمه ما عدا بعض أنواع الموسيقي والاشكال اللي مش بتحتاج ده بس معظم ال pop science بيعمل كده، أي مغني هتبقي غلطته الوحيده أنه مذاكرش كفايه مع فرقته واستسهل ساعتها هتحصل مصايب على المسرح، وبتمني انه اللي بيتكلم عن الموضوع يكون مذاكر هيقول ايه علشان ميظلمش حد وميظلمش نفسه».