«حججه فاضية وغلط في زمايله».. نجم الزمالك السابق يفتح النار على زيزو

شن طارق يحيى نجم نادي الزمالك السابق، هجومًا ناريًا على أحمد مصطفى زيزو نجم الفارس الأبيض، بشأن الأحداث المثارة مؤخرًا وأهمها تغيب اللاعب عن مران الفريق.
وقال طارق يحيى في تصريحات تلفزيونية عبر شاشة «إم بي سي مصر»: «زيزو نزل المران الأسبوع ده، طب ما كان من الأول، وتعليقي على أزمة زيزو، في جزء كبير للإدارة أنهم سابوا زيزو من غير تجديد حتى الاقتراب من انتهاء عقده».
وأضاف: «مينفعش أسيب اللاعب هو اللي يمسكني من رقبتي ويبقى متحكم، والنقطة التانية هي عدم الوضوح من زيزو، إنه بيقول للناس مامضيتش، وبعدين نتفاجئ كلنا إنه راح السفارة الأمريكية بيطلع تأشيرة».
وأكمل نجم الزمالك السابق: «للأسف الخطوة بتاعت ذهابه للسفارة قبل مباراة مهمة ومصيرية بيوم واحد، خانه التوفيق فيها، خاصة توقيت دخوله مع توقيت استخراج الأهلي تأشيرات السفر».
وأردف: «الامتناع عن الجمهور خوفًا من الجمهور؟ جمهور مين ياعم! خايف من مين؟ من الجمهور اللي عملك واللي خلاك تبدع وتروح منتخب مصر؟».
وواصل طارق يحيى: «اللي بيقوله ده تهريج وحجج فاضية، وعدم الوضوح من البداية أدى لهذا الكلام، وكمان رايح يشتكي نادي الزمالك اللي ليه فضل عليك وعلى كل من ينتمني إليه».
وزاد: «أنا عارف أخلاقيات زيزو، واللي ساقه في القصة دي مش هو وأنا متأكد من ده، أنا مرنته وعارفه كويس، وعيب جدًا يقدم شكوى في نادي الزمالك لأي سبب من الأسباب، دي مش دماغك ده حد ورطك إنك تغلط في ناديك وزمايلك».
وتابع: «إحنا وصلنا لمرحلة إن اللاعب أو والد اللاعب بيشترط رحيل مجلس إدارة نادي الزمالك عشان يجدد، لأي يا سيدي بالسلامة مش عايزينك».
وأتم طارق يحيى حديثه قائلًا: «لا لوم على النادي الأهلي إنه تدخل في مفاوضات إن صدقت الأنباء المتداولة، مينفعش يبقى قدامي لعيب زي زيزو ومخلصوش طالما متاح».