النص الكامل لأقوال ابن مستأجر معدية أبو غالب: «3 بنات اللي كانوا عايشين والحادث قضاء وقدر» (خاص)

تصدر محكمة جنح مركز إمبابة وكرداسة في الجيزة، صباح غدِ الأحد، حكمها في قضية «ميكروباص معدية أبوغالب»، الذي سقط في مياه نهر النيل ما أسفر عن مصرع 16 فتاة وسيدة وإصابة أخريات من العاملات بإحدى مزارع العنب، بسبب نزول سائق سيارة الأجرة للاشتباك مع شباب قال إنهم عاكسوا عددًا منهن.
تفاصيل قضية ميكروباص معدية أبو غالب
تضم القضية 5 متهمين- يتقدمهم سائق الميكروباص وعاملا المعدية ومالكها ورئيس مركز ومدينة منشأة القناطر، وتنشر «المصري اليوم» نص شهادة ابن مستأجر معدية أبوغالب، أمام النيابة العامة والتي أدان فيها سائق الميكروباص وقال إنه سمع من الأهالي إنه ترك الفرامل دون أن يشدها فنزل في المياه، وحينئذٍ توجه هو إلى مكان الحادث واستطاع انتشال 3 فتيات من المياه وبمعاونة الأهالي أخرجوا جثثًا، لافتًا إلى عدم وجود شبهة جنائية وأن الحادث «قضاء وقدر».
وروى أن والده يستأجر المعدية من المحافظة، ولا يدري عما إذا العاملين عليها مؤهلين من عدمه.. وإلى نص أقواله كاملة.
الشاهد الأول: محمد ربيع سيد أحمد عبدالحميد، السن/ 32 سنة. عامل بشركة شعاع للخدمات العامة، المقيم بطريق السكة الحديد- محطة أبوغالب.
س: ما معلوماتك حول الواقعة محل التحقيق؟
ج: اللي حصل أنا كنت في بيتي وأنا ساكن على البحر جنب مكان المعدية والنهاردة الصبح، أنا كنت نايم وصحيت على صوت ناس بتصرخ جامد وأهالي كثير بيصوتوا فقومت جريت علشان أشوف في إيه، ولما نزلت لقيت إن معدية أبوغالب واقفة على الغرب وبيقولوا إن في ميكروباص وقع في النيل وكان فيه بنات راكبينه وكلهم وقعوا في الميه، فقمت نطيت في النيل علشان أحاول أساعد أي حد واطلعهم، وفعلًا طلعنا ناس عايشة وفي ناس ماتت وبعد كده الحكومة جت والحماية المدنية جم علشان يطلعوا بقية الجثث، ولما النيابة جت قولت إن أنا شاهد وشوفت الواقعة، وجيت على هنا علشان أشهد باللي شوفته.
س: متى وأين حدث ذلك؟
ج: الكلام ده حصل النهارده 21-5- 2024 حوالي الساعه 7:15 الصبح في معدية أبوغالب بجانب السكة الحديد في منشأة القناطر.
س: من كان برفقتك آنذاك؟
ج: كنت لوحدي.
س: صف لنا تحديدًا ما تناهى إلى سمعك بالزمان والمكان آنفي البيان؟
ج: وأنا نايم في البيت سمعت صوت صريخ جامد عند المعدية، وأهالي بتصوت.
س: وما الذي أبصرته تحديدًا فور توجهك لاستبيان الأمر؟
ج: جريت علشان أشوف في إيه، ولما نزلت لقيت إن معديو أبوغالب واقفه على الغرب وبيقولوا إن في ميكروباص وقع في النيل، وكان فيه بنات راكبينه وكلهم وقعوا في الميه.
س: صف لنا تحديدًا مواصفات تلك العبارة؟
ج: هي معدية مصنوعة من الحديد طولها حوالى 25 مترًا وعرضها حوالي 10 أمتار، ومحاطة من الجنين بسور حديد من كل جهة.
س: وفيم تستخدم تلك العبارة؟
ج: في نقل الناس والعربيات من البر الشرقي للبر الغربي لأبوغالب، والعكس علشان يعدوا نهر النيل.
س: ملك من تحديدًا تلك العبارة؟
ج: اللي أعرفه إن المعدية مملوكة لمحافظة الجيزة، بس أبويا مأجرها من الحكومة.
س: ومن تحديدًا شخص مستاجر تلك النقالة؟
ج: أبويا المدعو ربيع سيد أحمد.
س: أمن ثمة عقود مبرمة بين والدك سالف الذكر وبين الجهة مالكة النقالة محل الواقعة؟
ج: اللي أعرفه إن أبويا مأجر بعقد إيجار، بس أنا مشوفتش العقد قبل كده.
س: وهل صادر لها ثمة تراخيص من الجهات المختصة للإبحار؟
ج: معرفش.
س: ومن شخص المسؤول عن ترخيصها؟
ج: المفروض والدي هو اللي بيرخصها.
س: وهل استصدر سالف الذكر ثمة تراخيص بشان تشغيل تلك العبارة؟
ج: أنا معرفش.
س: صف لنا تحديدًا شروط السلامة والأمان المفترض تواجدها بتلك العبارة؟
ج: أنا برضو معرفش.
س: ومن تحديدًا أشخاص العاملين على إدارة وتشغيل تلك العبارة؟
ج اللي بيشتغل عيلها عمال كتير بس أنا معرفهمش واللي كان شغال عليها النهاردة الصبح يوم الواقعة هو المدعو مصطفى مشحوت السيد.
س: وهل أيًا من العاملين بتلك العبارة مؤهل للقيام بتلك الأعمال؟
ج: أنا معرفش.
س: وهل أيًا من العاملين على تشغيلها مرخص له من الجهات المختصة بذلك؟
ج: أنا معرفش.
س وما مدى توافر اشتراطات السلامة والأمان بالعبارة محل الواقعة؟
ج: أنا معرفش.
س: اتخضع تلك العبارة الاعمال صيانه بصفة دورية؟
ج: أكيد بتتصين بس أنا معرفش مين اللي بيصينها.
س: إذًا وكيف نما إلى علمك بالواقعة محل التحقيق تحديدا؟
ج: أنا كل اللي حصل زي ماقولت إني لما سمعت الصوت بتاع الصريخ نزلت لقيت الميكروباص اللي كان فيه البنات واقع في الميه، وبيقولوا إن كل البنات غرقوا.
س: هل أبصرت واقعة سقوط المركبة (الميكروباص) محل استقلال المتوفين والمصابين؟
ج: لا، أنا لما نزلت من بيتي كان الميكروباص وقع في الميه.
س: صف لنا كيفية سقوط المركبة (الميكروباص) من أعلى العبارة؟
ج: أنا مشفتش حاجة، أنا نزلت لما صحيت على صوت الصريخ.
س: وما حدث لما سقط الميكروباص في المياه؟
ج: أنا سمعت من الأهالي إنه وقع لما السواق اللي كان راكب فيه نزل منه وسابه من غير فرامل اليد فالميكروباص أتحرك لورا ووقع في الميه.
س: أمن ثمة شخص تسبب عمدًا أو يإهمال في سقوط المركبه آنفة البيان؟
ج: أنا معرفش.
س: ومن شخص المسؤول عن استخدام مكابح اليد الخاصة بالمركبة آنفة البيان؟
ج: أكيد السواق اللي عرفت من الأهالي إن اسمه محمد خالد عبدالجواد.
س: أمن ثمة شخص آخر أو مركبات أخرى سقطت بالمياه بتلك الأحيان؟
ج: لا الميكروباص بس اللي وقع.
س: ألم تحاول إنقاذ أيًا من الإناث مستقلي المركبة وقتئذ؟
ج: نطيت في النيل وحاولت أطلعهم، أنا والأهالي وطلعنا حوالي 3 بنات عايشين وساعدت الأهالي في إن هما يشيلوا الجثث.
س: أتعرف على هوية أيًا من الناجين أو المتوفيين إلى رحمة مولاهم؟
ج: لا.
س: من صف لنا تحديدًا كيفيه التشال جثامين المتوفيين إلى رحمة مولاهم وكذا إنقاذ الناجين من مستقلي المركبة محل الواقعة؟
ج: الأهالي وأنا وكل الناس نطت في الميه وطلعنا اللي قدرنا نطلعه.
س: وما التصرف الذي بدر من باقي مستقلي المركبات المتواجدة أعلى العبارة بتلك الأحيان؟
ج: العربيات كلها خرجت من المعدية.
س: وما سبب وفاة المتوفين إلى رحمة مولاهم: أميرة حمدي صابر مختار، وآلاء عبدالمجيد عامر عطية، وزينب أحمد لطفي عبداللطيف، وشهد محمد عبدالتواب السيد، وروضة هشام عبدالنبي على، وجنا عبدالله محمد أحمد، وملك عادل صقر حسن، ويسرا مجدي عبدالغني، وروان رمضان عيد محروس، وتهاني السيد عمر سليمان، وجنى إيهاب جمعة عبدالباسط؟
ج: اللي سمعته إنهم ماتوا من الغرق لما الميكروباص اللي كانوا فيه وقع في النيل.
س: أمن ثمة خلافات فيما بينك وبين أيًا من سالفي الذكر؟
ج: لا أنا معرفهمش.
س: وما هو السبب الرئيسي إذًا لسقوط المركبة (ميكروباص) محل استقلال المتوفين إلى رحمة مولاهم وكذا الناجين؟
ج: أنا معرفش بس سمعت من الناس اللي كانت هناك إن السواق بتاعه سابه، ونزل منه ومشدش فرامل اليد فالميكروباص أتحرك ووقع في المياه.
س: هل من ثمة شبة جنائية في وفاة وإصابة مستقلى المركبة آنفة البيان؟
ج: لا، اللي عرفته إن الحادثة حصلت قضاء وقدر.
س: ما قولك فيا ثبت بمحضر جمع الاستدلالات المؤرخ في تاريخ 21-5-2024 تلوناه عليه تفصيلًا؟
ج: أنا كل اللي عرفته عن الموضوع وشوفته قولت عليه.
س: ما صلتك تحديدًا بالمتهم مصطفى مشحوت سيد؟
ج: أنا أعرفه شكلًا، وأعرف إنه ابويا مشغله عامل على المعدية.
س: ومن تحديدًا باقي أفراد طاقم تشغيل وإدارة العبارة محل التحقيق؟
ج: معرفش.
س: وهل للمتهم معاذ أحمد محمد عبدالحميد ثمة دور بشأن تشغيل وإدارة العبارة محل الواقعه؟
ج: دلوقتي لا، لأن (معاذ) كان بيشتغل فعلاً عليها بس ساب الشغل من حوالي 3 أيام علشان عنده امتحانات وبيذاكر فقعد في البيت.
س: وما قولك فيما قرره المتهمين: مصطفى مشحوت السيد، ومحمد خالد عبدالجواد بتحقيقات النيابة العامة والثابت به؟ (تلوناه عليه تفصيلاً)
ج: أنا كل اللي شوفته قولت عليه.
س: هل لديك أقوال أخرى؟
ج: لا.