«قعدة صعبة».. عمرو أديب يحذر المصريين من الأسبوع المقبل.. لهذا السبب (فيديو)

أكد الإعلامي عمرو أديب، أن عملية الإصلاح الاقتصادي دائما ما تكون صعبة، مشيرا إلى أن الدولة لا تريد أن تزيد الضغوط على المواطن.
الدولة لا تريد أن تزيد الضغوط على المواطن
وقال أديب خلال برنامج «الحكاية» المذاع على قناة «إم بي سي مصر»: «أيام تفصلنا عن زيارة صندوق النقد الدولي، وعرفنا أن مدير عام الصندوق هتزور مصر عشان تناقش الرؤية المصرية وموضوع الإصلاح الاقتصادي».
وأضاف، «الأسبوع الجاي هتبقا فيه قعدة صعبة.. ولازم نحط ورقنا ونشوف معاهم حل، ومينفعش حد يقول هنهدها على دماغهم لأنها هتتهد على دماغنا كلنا»، مشددا على ضرورة معرفة فكرة الصندوق عن فكرة المرونة في سعر الصرف.
وتابع، «محدش يقول هو الصندوق بيعملنا إيه.. إحنا بنشتري صندوق ولازم تكون علاقتنا معاهم كويسة، ولكن المواطن فوق الجميع لذلك نحاول الوصول مع الصندوق لصيغة ما».
وأضاف: «مشكلتنا ومشكلة دول نامية كتير مع الصندوق أن الإصلاحات بتبقى شديدة بتبقى قوية يعني المجتمع مبيقدرش يتحمل أوي هذه الإصلاحات بشكل مرن، فبيبقى في نوع من أنواع التفاوض والصراع في الآراء أنه أنا هعمل هذا الإصلاح، ولكن أنا في نفس الوقت مش عايز أحط المجتمع بتاعي تحت ضغط اقتصادي كبير، وهو بالفعل تحت ضغط اقتصادي كبير».
وتابع: «أنا مش عايز أزود الضغط طيب إزاي أقدر امضي بالإصلاح بأقل ألم ممكن ولما حصل مرتين في البنزين أكيد هو شيء مؤلم وزيادة السولار ساهمت في زيادة أسعار كل شيء، فهو مباشر عليك، الكلام اللي بيكلموا عليه الإصلاح الاقتصادي ده مباشر».
وواصل: «أنت بتتفاوض معاه وتقوله لو سمحت أيوة أنا اللي مقدم البرنامج الوطني ده واللي اتفقت معاك في هذا الأمر، وأرى أن الوضع الذي يدور حولي غير مطمئن وبيعمل ضغوط عليا كل يوم وأنا مصاريفي بتزيد وأنا بقولك لو سمحت عايزين نعيد النظر في هذا الاتفاق».
الإصلاحات الاقتصادية
وأوضح: «طبعا الصندوق واضح في المسائل دي والست كريستالينا قالت الإصلاحات لازم عاجلا مش آجلا وقالت هي متفهمة للوضع المصري وموضوع الضيوف الموجودين ووضع السودان وغزة وقالت ممكن بعد كده تكلفة الإصلاح تبقى عايزة».
تحرير سعر البنزين
وأكمل: «أنت هتقعد معاه تقوله لو سمحت أنا مش عايز اضغط على المواطن أكثر من كده، وأنا عايز استنى شوية في تحرير سعر البنزين أنت عايزني أشيل كل الدعم على آخر 2025 وأنا عايز أمد الوقت ده شوية.
واختتم: «لما تسألني أنا أنت يا عمرو إيه الشيء المزعج في كل إصلاحات الصندوق أنا اكتر شيء أول ما يتم ذكره يبقى مزعج جدا اللي هو بيقولوا عليه مرونة سعر الصرف، بالبلدي كده الدولار والجنيه، أنا بنزعج جدا، تقولي الشفافية والشركات لازم تبيعها وتخارج الدولة تحت أمرك حتى أوصل معاك للدعم على المحروقات ماشي، إنما الأمر بتاع هذا الإلحاح، أنا مش جايب الكلام من عندي وحضراتكم شوفتوا الراجل المسؤول عن الشرق الأوسط موضوع المرونة ده مش عاجبنا مفيش مرونة في سعر الصرف، عمرو لا يقول إن الدولار هيزيد ولكن الصندوق بيقول إيه أنا مش شايف مرونة».
عمرو أديب: الأسبوع الجاى في قعدة صعبة مع صندوق النقد.. مفيش مجال لفواتير أسعار وكهربا وغاز وطاقة اكتر من كده
شاهدوا #الحكاية على #MBCMASR من الجمعة إلى الاثنين 10م بتوقيت القاهرة من هنا https://t.co/dw22cTIRCQ pic.twitter.com/ALeTm2hpHE
— الحكاية (@Elhekayashow) October 27, 2024