«حط بلستر على بوقك».. رسالة نارية من إبراهيم سعيد ل كهربا بعد أزمته الأخيرة

علق الإعلامي إبراهيم سعيد، على مقطع الفيديو الذي يوثق فرحة محمود عبدالمنعم كهربا نجم النادي الأهلي، العارمة بعد إهدار عمر جابر نجم الزمالك ركلة الترجيح، وتتويج الأهلي بالسوبر المصري.
وحقق النادي الأهلي بطولة السوبر المصري للمرة ال15 في تاريخه والرابعة على التوالي، بعد فوزه ليلة الخميس على نادي الزمالك بركلات الترجيح 7-6 بعد أن انتهى الوقت الأصلي والإضافي 0-0.
وقال إبراهيم سعيد في تصريحات تليفزيونية عبر شاشة «النهار»: «كهربا وكولر الاتنين محظوظين، واللعيبة هي اللي انقذت الموقف، الفرحة الهستيرية اللي فيها كهربا، لأن الفرحة دي فرحتين، أن الأهلي كسب بطولة، وكمان لو لا قدر الله حصل حاجة كان كهربا هيمشي قبل ما الأهلي يركب الطائرة في أبو ظبي، ودعم اللعيبة بيقول إن الأمور ممكن تقدر تتلم».
وأضاف: «كهربا تحسه كأنه هو اللي واقف جون مش الشناوي، وأنا بقول لو كان موجود في الملعب كان باس راس الشناوي وعمر جابر، لأنهم أنقذوه، الموضوع يقدر يتلم بس بأداءه جوه الملعب لو رجع».
وأكمل إبراهيم سعيد: «رسالتي ل كهربا أفصل دماغك شوية، وابعد عن السوشيال ميديا، وسيبك من الرد على الناس وأقفل على نفسك شوية، عشان هتتأخر كتير، وهتفضل بعيد عن المشاركة، وبتبقى مضغوط».
وواصل: «اجتهادك في الملعب وإخلاصك في تمرينك هو اللي هيرد، لو أنت موجود كمان ممكن يكون كولر يبعدك بأكثر من مباراة، عايز أشوف رد فعلك وقتها لازم تسكت، وياريت تجيب بلستر وأنت داخل النادي عشان محدش يسخنك».
وأتم إبراهيم سعيد حديثه قائلًا: «مجلس الإدارة بيحبك جدًا عشان كدة وقف معاك وقت أزمتك، والجمهور كمان، ورد في الملعب عشان خاطر الناس دي، أجبر كولر يلاعبك بمستواك وباجتهادك».