أغرب «حكاية خيانة» ترويها زوجة في دعوى خلع أمام محكمة الأسرة (تفاصيل)

تلقت محكمة الأسرة بالجيزة دعوى خلع أقامتها سيدة أعمال ضد زوجها الطبيب تطلب تطليقها خلعًا وتقر بتنازلها عن كافة حقوقها المالية والقانونية.
رفضت الزوجة الاستجابة لمحاولات أعضاء مكتب تسوية النزاعات الأسرية بمحكمة الأسرة وأصرت على إحالة دعواها إلى المحكمة لنظرها والفصل فيها، وقالت للخبيرة النفسية بمكتب التسوية بمحكمة الأسرة «لما هتعرفوا اللي حصللي هتعذروني وهتقولولي لازم تخلعيه»، لتروي بعدها تفاصيل دعواها.
قالت الزوجة مقيمة الدعوي أمام خبراء محكمة الأسرة: أنا متجوزة من حوالي 12 سنة وعندي ولد وبنت، جوزي دكتور محترم وله اسمه وسمعته وإحنا الاتنين من عائلات ميسورة الحال، عايشين كويس الحمدلله وولادنا كانوا كل حياتنا. أنا بدير شركة استيراد وتصدير من شركات والدي وقدرت أعمل أرباحا كبيرة على مدار سنوات إدارتي لها وحافظت على وضعها في السوق.
وتضيف الزوجة في دعواها أمام محكمة الأسرة: حياتنا كانت هادية ومافيهاش مشاكل لحد من شهرين بس حصلت حاجة لا يمكن كانت تخطرلي على بال ولا حتى في أسوأ كوابيسي.. اكتشفت إن جوزي الدكتور المحترم بيخوني مع 2 ممرضات من اللي شغالين معاه، ومعشم كل واحدة فيهم بالجواز.
وتحكي الزوجة قائلة لخبراء تسوية النزاعات بمحكمة الأسرة: صدفة من اللي بتحصل في الأفلام كشفتلي خيانة جوزي وكانت صدمتي أكبر من إني أصدق اللي عمله.. معقولة يعمل فيا كده بعد العشرة والعمر ده كله ؟!!.. صاحبتي شافته في مكان قاعد مع واحدة وصورتهم من غير ما ياخدوا بالهم، وطبعا أنا عرفتها لأني عارفة تقريبا كل الممرضات اللي بيشتغلوا معاه، ولما واجهته ما أنكرش وقاللي دي نزوة ومش هتتكرر وأنا كنت غلطان ووقع بالكلام وقاللي اسمها عشان أكتشف إنه بيتكلم عن واحدة تاني غير اللي صاحبتي شافته معاها- تكمل أمام محكمة الأسرة.
ماكنش ينفع أكمل حياتي معاه تحت أي ظرف من الظروف ولا لأي سبب، وطلبت منه يطلقني فورًا، وقولتله إنه كداب وإنها مش نزوة ولا الكلام الفارغ اللي حاول يقنعني بيه. لكن هو أصر على إنها نزوة وطلب مني أسامحه ووعدني بإنه مستحيل يكرر اللي عمله ده تاني، لكن أنا كنت خلاص أخدت قراري بالطلاق ولا بديل عنه – هكذا قالت الزوجة صاحبة الدعوى في محكمة الأسرة.
وأضافت: بعد رفضه الطلاق لم أجد أمامي سوى اللجوء إلى محكمة الأسرة لإقامة دعوى خلع ضده.