شوبير يوجه رسالة نارية ل الزمالك: «كسبت إيه من انسحابك قدام الأهلي؟»

وجه أحمد شوبير نجم الأهلي السابق رسالة نارية إلى نادي الزمالك ومسؤوليه وجماهيره عقب فوز الفريق الأبيض على سيراميكا كيلوباترا بعد عدة أيام فقط من انسحابه أمام الأهلي في مباراة القمة.
وقال أحمد شوبير في تصريحات إذاعية صباح اليوم الأحد: «جوزيه جوميز مدرب الزمالك قال أنا لسه في المنافسة، طب إديني أمارة يا مستر جوميز فارق النقاط أنا موفقك ده النظري لكن العملي بيقول لأ وصعب جدا، وأنا مش بحمّل مستر جوميز أنا بحمل السمؤولين وأصحاب القرار، وبقول لهم: ماذا جنيت من انسحابك أمام الأهلي».
وأوضح شوبير: «الزمالكاوية بيقولوا كده دلوقتي بعد ما كانوا بيقولوا لي وأنت مالك إيه اللي مدخلك، يا عم أنا نبهتك وقلت لك فكر وألعب وأخد الحق صنعة، أنا بسأل سؤال بالمستوى اللي قدمه الزمالك قدام سيراميكا مش شايف إنه كان ممكن يقدم مباراة قوية قدام الأهلي وكان ممكن يكسب وأنا قلت المباراة 50 /50 بين الأهلي والزمالك وأنت بتلعب بفريق حاليًا يضم لاعبين جيدين وعندك فرقة ثقيلة».
وتابع شوبير: «أيهما كان أفضل بدون عصبية وبصوت العقل كده: كنت تلعب المباراة ولا كنت تنسحب..؟ ولا أنت لما حد يقول لك نصيحة لوجه الله يبقى ده عدوك ومش عايزك تنجح، تخيل في السعودية كده وعندك مباراة الهلال والنصر وييجي فريق الهلال ليلة المباراة يقول لك مش هلعب المباراة مينفعش، أنت الزمالك بتاريخك وجماهيرتك واسمك الكبير وحاجات كثير ياما».
وأضاف شوبير: «تاني إيه هي المكاسب اللي حققتها..؟ أنا مش بتاع إحنا خدنا 70 في المائة من اللي كنا عايزينه، الكلام ده مش بياكل مع الناس خلينا واضحين، واللي بيقولوا الكلام ده نفسه مش مقتنعين بيه بس أنت كمجلس كان لازم تدافع عن القرار، بس ليه لما الواحد يكلم بالعقل الناس تزعل وتغضب مننا طب أغضب أنا هقول إيه يعني».