«تهريج في تهريج».. شوبير يهاجم اتحاد الكرة بعد أزمة مغادرة صلاح لمنتخب مصر

شن الإعلامي أحمد شوبير حارس مرمى الأهلي ومنتخب مصر السابق هجوما عنيفا على مسؤولي اتحاد الكرة عقب أزمة محمد صلاج الدائرة حاليًا وعودته إلى ليفربول لاستكمال علاجه عقب مباراة مصر ضد الرأس الأخضر.
ويواجه منتخب مصر مساء اليوم الاثنين نظيره الرأس الأخضر في مباراة حاسمة ضمن الجولة الثالثة من مباريات دور المجموعات في بطولة كأس الأمم الأفريقية بكوت ديفوار.
وقال أحمد شوبير في تصريحات إذاعية:«إنتوا عارفين فيلم الكيف لما يحيى الفخراني راح العزا قال أنا أهرج، إحنا بنهرج اللي بيحصل في الكرة المصرية اسمه تهريج في تهريج أنا ابني في مدرسة لما ابني يغلط بيقولوا له هات لنا ولي أمرك فولي أمر الكرة المصرية هو الاتحاد المصري لكرة القدم ده المسؤول فلما يحصل أي حاجة تحت المظلة المفروض اتحاد الكرة هو اللي يكون مسؤول ويوضح كل شيء».
وتابع أحمد شوبير: «هخش في شوية لخبطة عندي إصابة محمد صلاح وكلمة في البداية مهمة جدا، محمد أبوالعلا من أحسن الأطباء في مصر، وما تقوليش دكتور مش هيعرف يشخّص إصابة، وهنا هنخش في نظرية الاحتمالات احتمالات أي يا أختي، ايوه احتمالات.. الاحتمال الأول إما صلاح إصابة كبيرة وإحنا خبينا ومرضيوش يقولوا، أو الاحتمال الثاني إن الإصابة مش قوية قوي وبرضه هقول تاني مفيش شد عضلي يا جماعة ياخد أقل من 10 إلى 15 يوم وخاصة شد الخلفية، أو الاحتمال الثالث إنه مفيش إصابة أصلًا وفيه زهق من محمد صلاح وعايز يمشي».
وأضاف شوبير: «طيب تعالى نحلل احتمال مفيش اصابة ده مستحيل المستحيل مش أخلاق محمد صلاح خالص ولا طبيعته، يا اتحاد الكرة المصري أنت المسؤول وانت اللي بتدير فهل فيه حد يتحدث بالنيابة عنك قولنا مين المنسق الإعلامي لمنتخب مصر (الزميل محمد مراد) هل طلع بتصريح قال أي حاجة من بداية الأزمة عن إصابة صلاح».
وواصل شوبير: «على فكرة محمد صلاح عمل مؤتمر محترم امبارح واكلم عن إصابته وقال هيبقى فيه كلام بين النادي والمنتخب بس إحنا مخدناش بالنا ولا قرينا اللي بين السطور، طيب حصل الاتصال والاتفاق مع مسؤولي ليفربول، اطلع قول يا اتحاد الكرة وعرّف الناس أنت ليه بتشيل محمد صلاح الليلة ليه، إحنا لفينا ودورنا واتحطينا في الموقف ده والناس هايجة على صلاح وانت ساكت».