«مراتك محراب أعبد ربنا فيه».. أمين الفتوى لزوج متصلة: «النبي خصيمك يوم القيامة» (فيديو)

استقبل الشيخ عمرو الورداني، أمين عام الفتوى بدار الإفتاء المصرية، سؤالًا من متصلة تقول «والدى توفى وأنا عمري 5 سنوات، وأخواتي يعاملونني بطريقة سيئة، واتجوزت غصب عني، أنا متزوجة من 8 سنوات ومعايا 4 بنات».
وأضافت: «أنا خلفت ورا بعض، لأن زوجي مكنش عايز إني آخذ فترة راحة بينهم، بقالي 8 سنين متزوجة مشوفتش يوم راحة، ودايما يقولي لو مش عاجبك روحي بيت أهلك، لأنه عارف إني مش هقدر أروح»، متابعة باكية: «أنا مش عارفه أعمل إيه؟! فكرت كذا مرة في الانتحار أو أسيب البيت وأمشي، بس في الآخر بفكر في بناتي».
وقال «الورداني»، خلال برنامج «ولا تعسروا»، عبر قناة مصر الأولى، اليوم الإثنين: «معندناش أي شيء علمي يقول إن المرأة هي المسؤولة عن نوع الجنين، أغلب الأبحاث بتقول أن الكلام ده مش منها».
وأشار إلى الحديث النبوي «مَن كان له ثلاثُ بناتٍ أو ثلاثُ أخَوات، أو ابنتان أو أُختان، فأحسَن صُحبتَهنَّ واتَّقى اللهَ فيهنَّ َفلهُ الجنَّةَ»، متابعًا: «انتوا عندكم نعمة يجب تشكروا ربنا عليها».
وأضاف أمين الفتوى موجهًا حديثه للزوج: «اتقى الله، وأشكر الله على نعمة البنات، البنات تربيتهم في غاية الجمال ورزقهم واسع، ربنا بيكرم معاهم جدًا».
وتابع: «الحاجة التانية، انت عندك امرأة، ربنا جعلك باب من أبواب السعة والبركة، إنك تحن وتعطف عليها، وتجعلها في أمانك، وتحقق وصية النبي على أفضل ما يكون»، مشيرًا إلى الحديث النبوي «استوصوا بالنساء خيرًا».
وأكمل: «عندك فرصة إن ربنا يعاملك من باب الكرم ويوسع عليك، لكن إنك تهدد مراتك!! دي لحمك ودمك، إنت مسؤول عنها أمام الله، كل شوية تدخل عليه الفزع والخوف، رسول الله قال إنه ليس من أخلاق المسلم أن يفزع أخاه، ده مش من الأخلاق، إنت عندك حد لو أذيته النبي هيكون خصيمك يوم القيامة، وإذا أكرمته ستكون بجواره».
واستطرد: «اتقى الله في هذه المرأة وفي أولادك وكفاية خلفة، وشوف هتربي البنات اللي هما نعمة ربنا وإزاي هتخليهم باب من أبواب دخولك الجنة، الست مراتك محراب أعبد ربنا فيه، وولادك دي نعمة اطلب وسع الرزق بإنك تحسن إليهم، البنات دول هيبقوا سندك وربنا هيجعلهم باب من أبواب الخير والسعة عليك».