خالد سعيد

يا ليلة طالت على البلد وأهلها.. امتى هاييجى فجر مصر الجديد.. ده شبابها زى الورد ضحوا لأجلها.. صحوا الهمم وقربوا لنا البعيد..ولإن خالد ده ضناها وابنها.. وروحها فيه خافت عليه من العبيد.. خافت يغيب زى ما غاب النهار.. وغابت سنين العدل والحرية.. خافت يعيش فى يوم بعيد عنها.. لكنها خافت لينسى القضية.. حطت إيديها على قلبها اتنهدت.. وحاولت تكون قوية.. قالوا لها إبنك ع الفساد ثاير.. قالت لهم قوموا وثوروا معاه.. قالوا لها إبنك ع البلاد داير.. قالت لهم قودوا الطريق لو تاه.. وفى يوم لابد الشمس تشرق تانى.. طالما خالد وإخواته وراه.. صلت فى ليلة ركعتين ودعت له.. يعيش سعيد بالبلد ويموت شهيد.. يا أم خالد يا أم المصريين.. ملايين ولادك فى البلد ملايين. خالد إبنك وكلنا أولادك.. شباب مصر وعلى طريقه ماشيين.. يا مصر طال ليلك بقالنا سنين.. مستنيين تغيير مستنيين.. من دم أولادك اتسقى الياسمين.. والشمس طلت مع الفجر الجديد.. كل اللى كان ظالمنا فى النار أكيد.. و«خالد سعيد» فى الجنة خالد سعيد.
ayman_gado1@yahoo.com