خالد وروان فى العيد

خالد: أنا مبسوط قوى يا روان إنى هحضر العيد معاكى يا حياتى.. فاكرة كنا بنتمنى اليوم ده من زمان.
روان: ياه يا حبيبى.. بجد مبسوط؟! كنت فاكرة إنى أنا بس اللى حاسة الإحساس ده. خالد: عايزة تروحى فين بقى؟!.. ونسافر من الوقفة.
روان: الوقفة.. لأ.. أنا لازم أروح أول يوم عند ماما.
خالد: ماما؟! ما بقالك 30 سنة بتعيدى مع ماما.
روان: 30 إيه؟؟ 30 سنة.. لا يا حبيبى 29 سنة بس.
خالد: 29 سنة ولا يهمك.. نخلى السنة ال30 معايا بقى ما أنا ما قلتش نروح لماما.. وفضلت أعيد معاكى.
روان: لأ.. العرف بيقول إننا لازم نعيد مع ماما.
خالد: يعنى كل مصر هتعيد عند مامتك!!
روان: لا يا خفيف.. قصدى إن العروسة تعيد مع أمها.
خالد: العروسة آه.. طيب، يعنى مش عايزة إننا نسافر فى مكان مع بعض عشان ماما.. Ok يا حبيبة ماما خلى ماما تنفعك.
روان: طب إيه رأيك نعيد مع ماما أول يوم.. ونسافر تانى يوم.
خالد: ليه هو العرف مجبش سيرة مامتى خالص.. فى ولا صفحة؟؟!
روان: لأ.. جابوا سيرتها وبصوت خافت فى «صفحة الحوادث»
خالد: بتقولى إيه؟! روان: بقول نروح لها تانى يوم يا حبيبى ونسافر ثالث يوم.
خالد: أما أراجع العرف الأول وبعدين نشوف ينفع ولا لأ!!!