فريدة .. شعر ل سعيد شحاتة

مش عارف هأقدر أعيش إزاى
هو سعيد ينفع يتنفس
وفريده بعيد
ينفع ما اندهش واقول يا امه
قلبى واجعنى
مين غيرك ممكن يسمعنى
ويطبطب على قلبى الموجوع
مش يا امه كفايه عليا غياب
كده فات أسبوع
وانا بعدك ناقص روح وضلوع
العتمه قلوع
والصمت ف حرم الخوف مشروع
والقلب بدون أحباب مقطوع
والدنيا بقت من غير موضوع يُجبر ويسرّ
- سقعان رغم إن العالم حَرّ-
مأسور وانا حُرّ
أيام بتمرّ مناجل فوق ضهرى المحنى
أسبوع وما حدّش روّحنى
ولا حدّ لمحنى غريب مهمل زى الأغراب
أسبوع والمصطبة مش ع الباب
والشيخ بيحاول يقنعنى: لأجَلَنا كتاب
وعنيا سحاب عمّال بيفضّى وبيغيّم
ورجول الأحزان بتخيّم فى القلب النور
متلخبط من أسبوع كامل فى بيبان الدور
باب دارنا ما عادش يلمّ طيور ويوزّع فرْح
الموت واضح مش محتاج شرح
والشجر إياه مش جايب طرح
الورد ف أرض الروح دبلان
وسكوتى ف عين مولانا إيمان
وبكايا ذنوب
أنا أمى ما كاتش يا عم الشيخ إنسان عادى
كانت أيوب
تعطش تسقينى الريق سكّر
كان ريقها حليب طازه وخرّوب
وكلامها دموع
كل الناس نايمة وشبعانة
وعنيا بتتقطع م الجوع
مش يا امه كفاية عليا غياب
كده فات أسبوع
امبارح نمت على سريرك
شميت ريحتك
حسيت بإيديكى على كتافى
أنا من غيرك خايف جدًّا
بس انتى هناك اوعى تخافى
زرتك يوم الأربع حافى
ولا حدش خد باله على القهوه من الحَفَيان
خدت معايا شجرتين فيكس وزرعت ريحان
كان نفسى أزرع شجرة مانجا
قال لى المانجا تلمّ الدبان
- ازرع لى كافور
- جدره غشيم بيهد الجدران
الفيكس كان رأى الفلاح اللى بيزرع
وأنا كان نفسى أزرع لك رمان
وأعمل بستان
زرع الفيكس وخد القرشين
ربك والحق مشيت زعلان
علشان الفيكس ما يشبّعش حزين وجعان
ولا يستر جتة واد عريان مجبر ع البرد
وكمان كان نفسى أزرع لك ورد
وأزرع لك توت
واحفر جنبك ساقيه بنبوت
واقعد نحكى
أسبوع ما سمعتش حكاويكى
عن خالتى عزيزة وستى وغيط عنب الباشا
ولا خوفك من طلة علوان
ودموع البدرى على الشاشة
ولا دمع عيونك ع الغايبين
الشيخ بيقول لى الدنيا يومين
كلنا رايحين
اصبر واجمد وادعيلها وعيش
بينى وبينك... وانا عارفك يا امه تحبى الضحك...
كان ناقص للشيخ حبة ريش ويقولوا ملاك
كان نفسك تيجى معايا هناك
وانا كان نفسى آجى معاكى هناك
بس هناك عايز حد حبيبك يستناك
يدخل وياك
ويطبطب على روحك بشويش
علشان يفتح لك شيش مقفول
ويسيبك جنبك العرش تقول
مين اللى غواك
مين اللى اداك مفتاح باب الدنيا ووداك
مين اللى قرالك أو قرّاك أصل الأنواع
وإزاى النوع مش زىّ النوع
مش يا امه كفاية عليا غياب
كده فات أسبوع
علقنا التوم ليلة امبارح ع الشّرّاعه
حطيت الساعة اللى ف إيدى على الفرن الطين
ووقفت أنده علشان تيجى تشوفى الباقى
هنعلّق فين
فلقيت أم آلاء بتسألنى: بتنده على مين؟
أمى..
بانده على أم....
يا أمّه.. أمّه
هنعلّق باقى الأحلام فين
طول عمرى باقول وياكى آمين
تابع خلفك شبه التابعين وانتى المتبوع
مش عارف أقوم من على بابك
وانا ناقص روح وعيون وضلوع
مش يا امه كفاية عليا غياب
كده فات أسبوع