ابنة فيروز: أمي كانت حريصة على شكلها أمام الجمهور

قالت إيمان جمجوم، ابنة الفنانة الراحلة فيروز، إن دور والدتها الراحلة الاجتماعي لا يقل عن دورها الفني، مضيفة: «كانت إنسانة جميلة، ولما أخدت قرار الابتعاد وبدأت حياتها كزوجة ثم أم، كانت بتبص للحاضر اللي عايشاه، ولم تتراجع عن موقفها في الانسحاب، وقالت إنها أخدت القرار إنها هتقف عند مرحلة معينة».
وتابعت إيمان جمجوم خلال مداخلة هاتفية لبرنامج مساء DMC مع الإعلامية إيمان الحصري، الليلة: «أمي كانت حريصة إن الجمهور يفضل شايفها بالشكل اللي اتعودوا عليه، كانت دائمة الشكر لأنور وجدي، وكانت طبيعية وبتحب جو الأسرة، وبتحب تعمل كل حاجة بنفسها، ولما قررت إنها مش هتتواجد على الشاشة عملت ده بالفعل، وظهورها كان قليل جدًا، وده ذكاء منها، دايما كانت تقول إن الفنان اللي يحب إن جمهوره يشوفه بصورة معينة لازم يعرف إمتى ينسحب».
وذكرت أن والدتها «لما كانت بتقعد تتفرج على أعمالها في الطفولة كانت بتقول إن الماضي ده كان حلم ولما تتفرج بتقول مش معقولة دي أنا، وبتشوف امتدادها الفني في أختها، واتعرض عليا أعمال في طفولتي بس أمي كانت بتخليني أركز في دراستي، وأبعدتني قدر المستطاع عن أجواء الشهرة، كانت بتقولي الدراسة أهم من الشهرة برغم إني من عائلة فنية معروفة، ونصحتني دايمًا إني أتعامل إني بنت عادية مش بنت مشاهير».