فيدرا عن دورها ب «إيجار قديم» :«بحب البهجة وخفة الدم وبكره النكد والشكوى»

كشفت الفنانة فيدرا، عن شخصية «كاميليا» التي تجسدها ضمن مسلسل «إيجار قديم» أمام الفنان شريف منير، والذي يذاع على إحدى القنوات الفضائية، لافتة: «كاميليا مش شبه شخصيتي في الحقيقة، لكن بحب البهجة وخفة الدم وبكره النكد والشكوى، وبحب الناس اللي شايفين النص الحلو دايمًا».
وأوضحت «فيدرا» خلال لقائها ببرنامج «عيش صباحك» على «نجوم إف.إم»، أن المسلسل كان يتم تصويره في نفس وقت عرضه، مضيفة أنها لا تفضل هذا الأمر، متابعة: «ما بفضّلش العرض وقت تصوير المسلسل، ما بحبش الزنقة دي، علشان دايمًا فيه ضغط العرض والمسئولية، إلا أن المسلسل ده كانت أجواءه حلوة بنشيل بعض، وميمي جمال، طيبة وحنينة وشربات بجد، وهي عاملة دورها كده زي شخصيتها».
وأكدت «فيدرا» أنها لا تعتمد على كون المسلسل ضمن موسم رمضان أو خارج الموسم، موضحة: «مش مؤمنة بموضوع المواسم زي موسم رمضان، لأن المفروض الفن شغال طول السنة، وطول السنة الحلو الناس هتشاور عليه، لأن مش دايما اللي بيتعرض في رمضان بينجح، بدليل إن «إيجار قديم» عامل نجاح كويس خارج رمضان، وأنا بشتغل اللي عاجبني سواء في رمضان أو خارجه».
وأشارت إلى أن «الناس محتاجة تتفرج على حاجة مريحة للأعصاب بعيدًا عن الساسبنس والأكشن، رغم إني بحب أتفرج عليهم بس ببقى عارفة إني هتعب، ده في المشاهدة، لكن أنا بشتغل ساسبنس عادي».