ليه الناس مبتفهمش أفلام يوسف شاهين؟.. محسن محيي الدين يجيب:

كشف الفنان محسن محيي الدين تفاصيل علاقته بالمخرج الراحل يوسف شاهين، مشيرًا إلى أنها بدأت في منتصف السبعينيات.
وقال «محيي الدين» خلال حواره ببرنامج «بالخط العريض»، الذي يعرض على قناة «الحياة»، اليوم الجمعة: «شهرتي بدأت في 1975 بعد ما عملت مسلسل على بيه مظهر مع محمد صبحي، ومن بعدها فيلم أفواه وأرانب مع فاتن حمامة».
وأضاف: «الفنانة رجاء حسين، كانت أمي فيلم أفواه وأرانب، وزوجها الفنان سيف عبدالرحمن كان بيشغل مع يوسف شاهين، وكانوا محتاجين شباب، فرشحني، وبعدين شاهين اتعرف عليا، ورشحت له أحمد سلامة وعبدالله محمود للعمل أيضًا».
وتابع: «كان أول عمل ليا كان فيلم إسكندرية ليه، وقالي إنه اكتشف موهبتي بعد ما الفيلم خلص».
وعن اتهام البعض لأفلام يوسف شاهين بصعوبة فهمها واستيعابها، قال: «يوسف شاهين حالة فريدة من نوعها، كان له فكر مفتوح على العالم، بالنسبة ليوسف شاهين لما تتفرجي على فيلمه كإنك بتقرأي 10 كتب، الموضوع بيكون شامل فيه ثقافة سياسية واجتماعية ونفسية، عشان كده أفلامه في ناس كانت بتفهمها وناس بترفضها».
وأوضح «محيي الدين»: «في ناس بعد فترة بيفهموا أفلامه، لما الإنسان بيمر في حياته بتطورات بيشوف الفيلم بعدين بعين تانية، يوسف شاهين ممثل جامد وكان بيحب التمثيل جدًا، وكان بيطلع موهبته في الممثل اللي قدامه عشان كده كان بيكتف الممثل اللي قدامه».