تامر فرج : هل ممكن أمثل من غير ما أسوّق لنفسي ب«ستوري» تافهة على السوشيال ميديا؟

عبر الفنان تامر فرج خلال منشور له عبر حسابه الشخصى بموقع «فيسبوك» عن حزنه الشديد بسبب قلة أعماله الدرامية والسنيمائية، متساءلا ما السبب، ويطلب من القائمين على صناعة الفن بالرد عليه.
وكتب فرج: «البوست ده مش حالة اكتئاب ولا يأس ولا انهزامية خالص هو مجموعة أسئلة أرجو أنها توصل للقائمين على صناعة الدراما والسينما والفن في البلد وبره البلد وحد يتكرم مشكورا بالرد عليها» .
وتابع: «الحمدلله الناس كلها بتقولي أن أنا موهوب وعندي كاريزما ومش عارف إيه وبيحيوني على أدائي وتمثيلي وشواهد كتير بتقول اني بعرف أمثل واللي يقهر السؤال اللي مش عارف ليه بيتوجهلي انا لما بيقولولي انت ليه مقل في أعمالك، ده احنا بننتظر مشاهدك وشغلك أو انت ليه ما بتعملش سينما أو انت ازاي ما بتاخدش مساحات اكبر من كده» .
وأضاف: «زي ما يكون أنا اللي مابشتغلش بمزاجي والأسئلة اللي بطرحها للمنتجين والمخرجين هي انا اسمي تامر فرج ممثل وسيناريست هل ممكن امثل عشان انا موهوب فقط مش عشان عندي فولورز كتير على السوشيال ميديا، هل ممكن أمثل أو أكتب بموهبتي من غير ما أتلزق في مهرجانات وحفلات، لأني مابحبش أروح أي حدث فني غير لما أكون موجود بجد ومرغوب في وجودي وهل ممكن أمثل أو اكتب بموهبتي من غير ما اقعد استعرض نفسي نفسي وصوري على الانستجرام واكتب صباح الخير وجمعة مباركة واكتب ايه رأيكم في اللوك الجديد أو افضل اسوق نفسي بصوري في الجيم وانا اتصبب عرقا وأفرز عضلات من كل حتة في جسمي» .
وتابع: «هل ممكن امثل أو اكتب بموهبتي من غير ما اسوق لنفسي على السوشيال ميديا بستوري تافهةأو تريندات هايفة لأني رافض فكرة تسويقي كسلعة على السوشيال ميديا رغمي اني عارف أن دلوقتي التواجد بالشكل ده ولو بصوره عبيطة أو اخبار حراقة عني وعن اهل بيتي هو الباب المفتوح للشهرة والحل الوحيد للتواجد عشان المنتجين والمخرجين يفتكروني، لكن انا للأسف مش متربي على كده واتربيت على احترام اهل بيتي واني اشتغل بموهبتي مش بتواجدي وخلاص ويوم ما استخدم السوشيال ميديا هستخدمها لنشر الوعي وتقديم محتوي هل ممكن اتعرف بشغلي ولا لازم اتعرف بالسوشيال ميديا» .
واختتم: «هل ممكن امثل مش عشان انا من شلة فلان أو صاحب فلان، مع العلم أن الوسط كله اصحابي لك أنا مش بعرف أفضل أبعت للمخرج فلان والمنتج علان تحياتي وسلاماتي وبوستات عيدكم مبارك وصباح الرضا، ومع العلم أن أخويا المخرج العبقري أستاذ وائل فرج ومع ذلك مش بيقدر يجيبني في أعماله أحيانا لأن جهة الإنتاج مش موافقة، هل ممكن المنتجين والمخرجين يتفرجوا على شغلي فيجيبوني مش اترفض أو اتقبل على هوي الكاستينج دايركتور، هل ممكن أمثل عشان أنا ممثل كويس أو كتاباتي توصل عشان انا بكتب كويس مش عشان في واحد أيا كان هو مين انا مش عاجبه أو عشان هو مكتفي باللي يعرفه ومش عايز يجرب اللي ميعرفوش».