«أنا خايف».. تعليق ناري من شوبير على أزمة الحكام قبل بداية الدوري

علق الإعلامي أحمد شوبير حارس مرمى الأهلي ومنتخب مصر السابق على أزمة مستحقات التحكيم في مصر قبل بداية الموسم الكروي الجديد وانطلاق بطولة الدوري المصري الممتاز في النصف الثاني من الشهر الجاري.
وقال أحمد شوبير في تصريحات إذاعية صباح اليوم الخميس :«هل ممكن تروح محكمة والمحامين يروحوا والقضية تاخد مجراها، وبعدين القاضي يوم المحكمة ما تلاقوش على المنصة، ممكن أي حد يغيب المحامي مثلا يغيب إنما القاضي لأ، نفس الأمر في (قضاة الملاعب) السادة الحكام في مصر هم أغلب ناس في المنظومة، كانوا بياخدوا 150 جنيه في المباراة لغاية ما وصل دلوقتي حكم الساحة بياخد 7 آلاف جنيه».
وأوضح أحمد شوبير :«المشكلة غن فلوسهم ومستحقاتهم بتتأخر، لكن لو لاعب فلوسه تتأخر الفيفا يجيبها المحكمة الدولية أي جهة إنما الحكام فلوسهم تتأخر عادي، والطبيعي لو الحكم غاب مفيش مباريات إلا عندنا، كان فيه ماتش الأهلي والاتحاد في أسكندرية الحكام ماراحوش وقالك المنطقة ما بلغتش الطاقم.. وكلموا الحكم أحمد جمال وراح للمباراة وأنقذ الموقف»ز
وتابع أحمد شوبير :«هقولكم القصة كاملة التحكيم بدأ في مصر هواية لحد ما سمير زاهر عمل التحكيم احتراف وقال لي نجيب لجنة حكام محترفة وقلنا يمسكها جمال الغندور ومشي زي القطر بعد كده جمال بقه عضو في اللجنة العربية والدولية وغيرها، ده أنا جيت مرة لقيت أحد الحكام بيقول لي أنا بروح أسوان بالقطر وبعدها عربية من المحطة للملعب وقلعت وغيرت وأنا في العربية عشان أحكم المباراة.. وبعدها قررت سفر الحكم لأسوان بالطائرة وينزل في فندق، ده حتى جهاد جريشة اللي راح كاس العالم في روسيا، هو اللي جاب التأشيرة بتاعته من روسيا مع أن فيه بتوع علاقات عامة في اتحاد الكرة».
وأضاف شوبير :«في ظل جهودي لحصول الحكام على حقوقهم، قام واحد ابن حلال من بتوع اتحاد الكرة (مش أحمد مجاهد على فكرة) راح لهاني أبوريدة قالوا الحق شوبير بيعمل مؤامرة وبيجب الحكام وبيقعد معاهم شكله هيعمل مؤامرة، تخيلوا دخلنا في الموجة الصعبة دي أيه ده وأيه المخ المريض ده».
وأردف :«بعد ذلك الحكام تم منع صرف مستحقاتهم بقرار من أحمد مجاهد وبعدين صرفوا الفلوس على مراحل، موضوع التحكيم دائما فيه مشكلة وفيه حدودتة ما تعرفش ليه، انت كاتحاد كرة بتاخد فلوس عن قيد اللاعبين من الأندية طب ليه ما بتاخدش فلوس الحكام من الأندية، وبعدين انت جايب مارك كلاتنبرج من إنجلترا عشان تدخله في مشكلة الحكام قبضوا ولا مقبضوش وعلى فكرة الحكام حاليًا هددوا بعدم التحكيم في الموسم الجديد لو ما حصلوش على مستحقاتهم».
واختتم شوبير:«أنت من الأول وفر البيئة الجيدة للنجاح أنا في الوضع ده كده خايف وقلقان، وكلاتنبرج قال هقعد مع جمال علام، يا ريت ما تدخلوش الراجل في الدوامة دي، لإنه لو دخل هيخدها اسبرنت من اتحاد الكرة للمطار ويقطع تذكرة بلا عودة اللي بتعملوه ده مش صح وفروا له مناخ جيد للنجاح».
تعليق ناري لشوبير على ازمة مستحقات الحكام قبل بداية الموسم الجديدhttps://t.co/hYJVFTv95q
— Ahmed Shobier (@ShobierOfficial) October 13, 2022