فنان يحكي قصة رفضه بمسلسل لعادل إمام: «قالى جبت نمرتي منين»

استضاف برنامج «الرسالة»، والذي يعرض على قناة «الحدث اليوم»، اليوم الأربعاء، الفنان حسان العربي.
وتحدث «العربي»، خلال حلقة البرنامج، عن أسباب غيابه عن الساحة الفنية مؤخرًا، قائلًا: «أنا موجود ولكن هناك تغيير في الوسط الفني مثل تغير المناخ».
وأوضح: «أنا مش بعيد، لكن كان الأول أغلب المخرجين نعرفهم ويعرفونا، إنما مفيش معرفة دلوقتي مع المخرجين الجداد، مفيش آلية لنا كممثلين إننا نتعرف عليهم ونقابلهم ونشتغل».
وأضاف: «إحنا وكأننا لسه بنبدأ من جديد، مش عارفين نشتغل إزاي، هروح على باب المخرج عشان أشتغل؟! أنا لو رحت هلاقي 3 أو 4 آلاف واحد واقفين على الباب، وهقعد 10 ساعات عشان أقدر أقابله».
وحكي «العربي»، عن تعرضه لموقف محرج من قبل عند طلبه العمل في مسلسل للفنان الكبير عادل إمام، قائلاً: «اتصلت بمسؤول في المسلسل، قلت له أنا فلان الفلاني، الممثل، عضو النقابة، ويشرفني أني أقابل لحضرتك وأشوف إذا كان ليا فرصة في العمل مع الأستاذ الكبير عادل إمام».
وتابع: «كان رد المسؤول عليا هو إنت جبت نمرتي منين!! وبعدين قالي مفيش عندي أدوار».
واختتم: «أنا اتضايقت جدًا، وزعلت إني كلمته، وهذا يحدث كثيرًا، فهناك مخرجين ومنتجين وغيرهم ممن يعملون في الوسط مش بيردوا على التليفون، طيب كده هشتغل إزاي؟! إيه الوسيلة إني اشتغل».