هدى رمزي تكشف حقيقة اعتزالها وسر خلعها الحجاب وعلاقتها بالشيخ الشعراوي (فيديو)

الفنانة هدى رمزى أعربت عن نيتها العودة للتمثيل بعد فترة غياب طويلة دامت أكثر من 20 سنة، قائلة إن صديقتها سهير رمزى هى من أشعلت داخلها الرغبة في العودة للأضواء.
وقالت هدى رمزى خلال لقائها مع الإعلامية ياسمين عز في برنامج «كلام الناس»، على شاشة «إم بي سي مصر»، مساء الأحد، إنها لا ترغب في العودة من خلال دور غير جيد، «مش عايزة أرجع وفي نفس الوقت أنزل من نظر الناس، مش عايزة أعمل حاجة الناس تقولى عليها إيه اللى رجعها؟ لازم أشارك في عمل يليق بيا ويعليني، مش عايزة أعمل أي حاجة والسلام، ومبيتعرضش عليا أعمال لأنى كنت مبتعدة تمامًا ومكنش فيه فرصة لحد يعرض عليا شغل».
هدى رمزى وسهير رمزى
وأضافت هدى رمزى: «بتواصل دايمًا مع الفنانة سهير رمزى ونورا وبوسى، وبقولهم اعتبروا إن عيبى الوحيد هو عدم حبى للتليفون، لأنى بحس أنه بيقتحم الخصوصية».
حلقة هدى رمزي مع ياسمين عز
وتابعت «طبعا بحن للتمثيل ولأيام جيلي، وبتخض على سهير رمزي، لأنها حبيبتي أوي، كانت بتعمل مسلسل مع هاني رمزي الأيام اللي فاتت، وكنت ببقى مخضوضة عليها، خصوصا لما بترجع الساعة 8 الصبح وتتصل بيا تقولي لسة راجعة، وهاني رمزي من الناس اللي تحبي تشتغلي معاهم».
وعن الفرق بين الوسط الفني بين الماضي والحاضر قالت هدى رمزي «زعلانة على المجال دلوقتي، وقتنا كان سهل تسمعي كلمة نجوم، كان عندنا فنانين عظام ومؤلفين ومخرجين، زمان كان فيه رواد في مجال الفن، لكن دلوقتي فيه قبلنا سوريا والأتراك والهند وإحنا بعدهم، ليه؟ ومن خلال متابعتي للفيسبوك بقيت بقول جيلي وحشني، حقيقي مفتقدة جدًا الحياة اللي كنت عيشاها مع ولاد جيلي، لكن الناس دلوقتي معندهمش وقت».
رأى هدى رمزى في الجيل الحالى
وقالت «زمان كان فيه غيرة فنية بس في النهاية بنحترم بعض من أصغر عامل لأكبر نجم، علشان كده بنتفرج على أفلام الأبيض وأسود وبنصدقها، مع أن يمكن الفنانين الحاليين متمكنين أكتر من ناحية الأداء، لكن إحنا كنا منورين أوى».
وعن حقيقة اعتزالها التمثيل خلال الفترة الماضية التي غابت فيها عن الأضواء قالت هدى رمزى «مبسوطة إني بظهر لناس أنا كنت بعيدة عنهم لكن كنت بتابعهم، أنا ضد فكرة الاعتزال، الفن مفيهوش اعتزال، ممكن الفنان يبعد شوية، لكن يعتزل من إيه؟ أنا مبتعدة فقط، والحقيقة أنا ابتعدت لأسباب شخصية، أنا بحب الفنان اللي بحتفظ بخصوصية في حياته، اكتشفت أخيرًا إن الناس بقت تقول وإحنا مالنا؟ لما تسمع المشاكل اللي بيطلبوا يعرفوها».
حقيقة اعتزال هدى رمزى
وعن شائعة ابتعادها عن التمثيل وارتدائها الحجاب بعد فتوى من الشيخ الشعراوى قالت هدى رمزى: «مش مقتنعة إن حد يقدر يقنعنى، لا الشيخ قاللي ولا الشيخ عملى، الحاجات دى بتبقى علاقة بين العبد وربه، مبيتدخلش فيها شيوخ، وبعدين أنا متحجبتش، لكن أنا احتشمت، الحجاب له مقاييس تانية، وعمرى ما قابلت الشيخ الشعراوي وماليش علاقة بأي شيوخ، أنا كنت محتشمة فقط بحط حاجة على الراس من باب الاحتشام، وبعدين شيلتها بعد حوالى 25 سنة».
وعن بداياتها قالت «أعجبت بمجال التمثيل عندما كنت بحضر مع والدي كواليس فيلم غروب وشروق للفنانة الراحلة سعاد حسني، والدي كان المنتج، وكان سني وقتها 12 سنة، وحفظت مشهد للسندريلا في البيت، وقلت له عايزة أمثل فقالي بدرى شوية».