محمد سامي يتعاون مع مؤلف شاب في «العمدة» لرمضان 2023 : «مصر بلد المبدعين»

كشف المخرج محمد سامي عن مؤلف مسلسله الجديد «العمدة» الذي يعود به إلى إخراج الدراما التليفزيونية بعد توقفه من مسلسله الأخير «نسل الأغراب».
ونشر «سامي» صورة تجمعه بالمؤلف الشاب مهاب طارق الذي يشاركه كتابة مسلسله «العمدة» الذي يلعب بطولته محمد رمضان، ويعودا خلاله للتعاون الدرامي بعد مسلسليهما «الأسطورة» و«البرنس».
View this post on Instagram
A post shared by Mohamed Sami (@directormohamedsami)
وكتب «سامي» عبر حسابه الرسمي على موقع «انستجرام»: «من فترة طويلة جاتلي مكالمة وسط مكالمات كتير لشباب بيعرضوا مشاريع من تأليفهم سيناريوهات أفلام ومسلسلات واللي كلمني الشاب اللي واقف ورايا في الصورة، اللي لفت نظري ليه في المكالمة أسلوبه وترتيب أفكاره وثقته في نفسه وموهبته اللي كانت واضحة في شغفه تجاه الفن، حاجه كمان لفتت نظري ليه وهي عزة نفسه رغم مكالماته الكتير ليا وفرض وإقحام نفسه فحياتي حتي أيام الأجازات ونصاص الليالي، وبعتلي أفكار وقلتله إكتب يا صديقي وإديني حاجة أقرأها، إنت مقضيها حكي وبس وده مش صح، وغاب فترة وقلت عليه كسول عايز يرغي وبس وبعدها بسنة ظهر وبعتلي سيناريوهات كتير كان غايب بيكتبها وقريتها كلها ولقيت عنده حاجة حلوة».
وأوضح «سامي»: «بدأنا نبقي أصحاب على التليفون وزي مالقيت عنده حاجة حلوة لقيت حاجات كتير وحشة في الكتابة وبدأت أناقشها أنا وهو وغاب تاني ورجعلي بمشاريع تانية مكتوبة أحسن وفضلنا نعمل كده وقت طويل قوي لحد ما طلبت منه نتقابل وفعلا إتقابلنا وهو دلوقتي صديقي وزميلي».
وتابع «سامي»: الخبر المهم اللي في الموضوع إنه هو اللي بيكتب معايا مسلسلي الجديد مسلسل العمدة، بطولة النجم محمد رمضان، وقصة وإخراج محمد سامي وسيناريو وحوار محمد سامي ومهاب طارق، كمان هو مؤلف فيلمي الجديد ومؤلف مسلسل على منصه مهمة إخراجي بعد«العمدة» إن شاء الله، إسم الشاب ده مهاب طارق، خريج معهد السينما اللي طلع عباقره كتير من أساتذتنا وزمايلنا، شكرا كل أساتذة المعهد على مهاب وشكرا أمه وأبوه اللي ربوه الرباية المحترمة دي، والبوست ده عشان يدي طاقة إيجابية لكل موهوب وموهوبة، ويخليهم دايما عندهم الأمل إني كلنا محتاجينهم أكتر ما هما محتاجين لينا، مصر بلد الفن والمبدعين، مبروك يا مهاب وعقبال كل زمايلك ودفعتك اللي متأكد إنهم هما كمان فيهم مبدعين زيك.
ويخوض المخرج محمد سامي مع الفنان محمد رمضان، دراما رمضان 2023 بمسلسل «العمدة» من تأليف وإخراج محمد سامي.
وكان قد أعلن «رمضان»، عن المسلسل بصورة تجمعه مع محمد سامي، عبر حسابه على فيسبوك، وعلق: «عملنا مع بعض مسلسل الأسطورة والبرنس.. ورمضان القادم بإذن الله ميعادنا معاكم بمسلسل (العمدة) تأليف وإخراج محمد سامي.. ثقة في الله نجاح».
كان آخر عمل درامي للمخرج محمد سامي هو مسلسل «نسل الأغراب» الذي عرض في رمضان 2021، في حين قدم محمد رمضان مسلسل «المشوار» في رمضان 2022.